Pơxiâm leh hiăng pro kêi kơjôi rơxế lơ treng ‘’Apía’’ vâ chơ tơmối ôm hyô a Đà Lạt
Thứ tư, 13:00, 25/12/2024
Tơplôu: Gương/VOV Tây Nguyên
Tơplôu: Gương/VOV Tây Nguyên
VOV4.Xơ Đăng- Kơmăng hâi lơ 24/12, a pơlê kong kơdrâm Đà Lạt, kong pơlê Lâm Đồng, Khu xiâm pơkuâ kŏng ti ngăn troăng rơxế lơ treng Việt Nam hiăng ai xúa péa kơjôi rơxế lơtreng ki lĕm La Reine pơxá (Apía) vâ pơto tơmối to sap Đà Lạt troh Trại Mát.
Kố cho tơmeăm khoăng ôm hyô vâ pêi pro tơdroăng ôm hyô Festival Reăng Đà Lạt rôh má 10 hơnăm 2024. Mâu kơjôi dêi rơxế lơ treng pơxá inâi “Apía” châ mơjiâng pro krip lĕm, tơkŭm ƀă túa Đông Dương ƀă túa mơjiâng pro dêi kong têa Pơhlăng, hlối lĕm tiô túa ton nah dêi Á Đông hlối lĕm ki tơviah xêh, rơngiâp rơhĭng dêi Đà Lạt.
Mâu kơjôi dêi rơxế lơ treng krâ ‘măn 36 to tăng ‘nân 2 pâ pro tơ’lêi hlâu ăm tơmối ngăn hlo mâu tíu nhâ loăng, ngo ngối drô troăng dế to rơxế lơ treng kŭn, pôa Nguyễn Thái Học - Ngế pơkuâ hnê ngăn Đảng pơtân dêi kong pơlê Lâm Đồng tối, kố cho môi túa ôm hyô ki tơviah krê xêh, tơ’mot hên tơmối troh ôm hyô ngăn vâ ‘nâi ki lĕm tơviah.
Viết bình luận