Túa mê cho môi tung mâu tơdroăng cheăng pêi dêi Tơdroăng tơkêa bro 6 tung Tơdroăng pơkâ dêi tơnêi têa ‘na mơnhông cheăng kâ, rêh ối kơpong kuăn ngo ƀă kong ngo, pơla hơnăm 2021-2030. Veăng túa pêi pro tơdroăng mê, veăng ai hnê mơhno dêi mâu ngế chêh tơbeăng ƀă tung pơla hnê kuăn pơlê, mâu ngế hriâm châ hlo hmâng hriâm túa tŏn chêng ing apoăng troh ki kân tâ, ‘mâi rơnêu tâng tŏn ôh tá tro tung mâu rôh tŏn chêng koăng, tăng ‘nâi plĕng vâ hlê tơ’nôm mâu ƀai chêng ton nah dêi mơngế Rơđế.

Mâu ngế hriâm xuân châ hmâ hnê tơdroăng vâ rơkê photovice - xúa um méa vâ hơ’muăn mâu tơdroăng ‘na túa lĕm tro ton nah dêi kuăn ngo.  Tơdroăng gum kuăn pơlê hlê nhên tâ ‘na ki pơxúa tơmeăm khoăng ki pin dế rak, tơ’nôm hâk tơngăm ƀă pơtối hnê tối ‘na túa lĕm tro tŏn chêng koăng Tây Nguyên; Pro tơ’lêi hlâu vâ túa lĕm tro chêng koăng chiâng xiâm tơdroăng ôm hyô, tơdjêp ƀă kuăn pơlê ƀă mơjiâng tíu ôm hyô ngăn tơmeăm khoăng.

Kơ’nâi pơlê kong kơdrâm Ƀuôn Ma Thuột, Khu xiâm kô pơtối tơbleăng pơcháu hnoăng cheăng po rơdâ troh a mâu tơring vâ pro tíu ki tơdjêp ƀă mâu rôh pêi pro rak ngăn tơmeăm khoăng  ton nah a kong pơlê Dak Lak.