Tiô pơkâ, troăng rơxế lơ treng Lào Cai – Hà Nội – Hải Phòng ai tâi tâng ki xŏn 417 km, tơkâ luâ 9 to kong pơlê (Lào Cai, Yên Bái, Phú Thọ, Vĩnh Phúc, Hà Nội, Bắc Ninh, Hưng Yên, Hải Dương ƀă Hải Phòng); tơdjêp ƀă kơno tuk lâp plâi tơnêi Hải Phòng, tơdjêp ƀă kong têa Sinuâ; pêi châ tơdroăng púi vâ pơto chơ tơmeăm dâi lĕm, rĕng, tơ’lêi hlâu ƀă tơniăn.

Klêi kơ’nâi hmâng pơchuât tơbleăng, Ngế pro xiâm hnê ngăn tơnêi têa pơkâ thế Khu xiâm ngăn troăng prôk ƀă rơxế kơtâu ƀă mâu khu xiâm, kơvâ cheăng, kơ koan ki ai tơdjâk mơdêk rĕng tâ nếo tơdroăng ki hbrâ rơnáu pơtroh tơdroăng tơkêa, tung khế 1/2025 athế pơtroh ăm Chin phuh vâ tung khế 2/2025 pơtroh ăm Kuô̆k hô̆i ai troăng ‘no liăn pro tơdroăng tơkêa ƀă mâu troăng hơlâ tŏng gum ki kal, hrá má môi cho khế 12/2025 athế pơxiâm châ pro troăng rơxế lơ treng kố.

Ngế pro xiâm hnê ngăn tơnêi têa pơkâ thế pơtối hriăn ngăn, tơmiât nhên troăng prôk, mâu tíu tot, ki têi kơchuâ chêh dêi tơdroăng tơkêa ƀă troăng troăng prôk tơdrăng má môi, ‘nâi má môi tâng chiâng, pôi tá pro achê troăng rơxế lơ treng ki ton ki prôk tiô troăng nếo; ‘mâi rơnêu mâu tíu tot ăm tơtro.