Tung 172 tíu kâng tê rôe tơmeăm pêi lo ing chiâk deăng a kong pơlê Kon Tum bu ai 20 tíu ki tê roê tơmeăm ai tŭm tơdroăng vâ pêi cheăng. Kơxô̆ ki u ối cho ai troh 88 tíu kâng kal tah lôi, xĕn pro a tíu ê; 64 tíu kal ‘mot tơ’nôm hồ sơ, mơ-éa nếo chiâng vâ pêi cheăng. Pêi pro tiô tơdroăng hnê mơhno dêi Vi ƀan hnê ngăn kong pơlê Kon Tum, khu kăn pơkuâ mâu tơring, pơlê kong kơdrâm tung kong pơlê dế khŏm pơxâu phâk mâu tơdroăng pro ôh tá tro dêi mâu tíu kâng.

Xôi ‘na tối tơbleăng dêi mâu tíu kâng tê roê tơmeăm pêi lo ing chiâk deăng a kong pơlê Kon Tum cho ôh tá pêi pro chêh inâi tê mơdró; ôh tá pêi pro tiô luât pơkâ tung hbru ăm mơ-éa mơnhên séa ngăn kâng lơ mơ-éa mơnhên séa ngăn hiăng tâi hâi khế la ôh tá vâ pêi pro séa ngăn. Tíu cheăng mơjiâng pro tíu kâng ôh tá tro ƀă pơkâ xúa tơnêi; tíu kâng ối a tíu ki ôh tá tơniăn troăng prôk, tá hâi châ pêi pro môi tuăn tơdjêp tiô pơkâ.