Kơvâ păn mơnăn mơnôa kong pơlê hbrâ pêi pro hên troăng vâ tơniăn tŭm tơmeăm vâ tê tung kơchơ mơdró. Tâi tâng khu kơpôu, ro, chu, í, peâp lâp kong pơlê nốkố châ vâ chê 18 rơtuh 500 rơpâu to, tâk dâng lối 1 rơtuh to tâng pơchông ƀă hơnăm hdrối. Kơxô̆ hơ’nêh pŭm tŭm túa châ 256.700 tâ̆n, tâk 11.700 tâ̆n, tơxâng tơdroăng kal vâ tê tung kong pơlê ƀă mâu kơpong ki achê mê tung roh Têt la ngiâ.

Pôa Nguyễn Văn Hà, Phŏ kăn pơkuâ ‘na pêi chiâk deăng ƀă Mơnhông thôn pơlê kong pơlê Dak Lak tối ăm ‘nâi: mâu khu tơrŭm cheăng, kơdroăng păn, rơpŏng păn tung kong pơlê dế tâk kơxô̆ păn mơnăn mơnôa vâ teăm tơdrêng tê tung kơchơ mơdró mơ’nui hơnăm. Khu hiăng hnê mơhno mâu tíu ki tơdjâk thăm hbrâ mơdât pơreăng a khu mơnăn păn, séa ngăn tơniăn krúa lĕm kế kâ a mâu tíu ki kơdê, siê chêh tơdjuôm, mâu kơchơ ki xiâm vâ pơkuâ ki dâi lĕm tơmeăm.