Khu râ kăn hiăng troh lăm pôu ƀă rơkâu mâu ƀok xối, mâu thái, yah chĭng ƀă kuăn khôp a Hngêi khôp kân Ƀuôn Ma Thuột, Khu teăng mâ khôp Tin Lành kong pơlê, Tíu hriâm vâ pro yah chĭng Nữ vương Hòa Bình, Hngêi khôp kân Ban Mê Thuột, Vi ƀan tơrŭm môi tuăn khôp Pâ Xeăng kong pơlê, Chi hô̆i Tin lành Alê A.

Teăng mâ khu râ kăn pơkuâ kong pơlê Dak Lak, pôa Trương Công Thái, Kăn phŏ hnê ngăn Vi ƀan kong pơlê pơtroh rơkong rơkâu hâi tĭng kân Pâ Xeăng chu chiâng kuăn mơngế tơniăn lĕm, hơniâp lĕm troh mâu kuăn khôp Pâ Xeăng, mơnhên mâu tơdroăng veăng kum dêi mâu kuăn khôp tung tơdroăng mơnhông tơdjuôm dêi kong pơlê. Tơdrêng amê mơnhên, kong pơlê đi đo nhuô̆m tơdroăng mơjiâng tơrŭm lĕm tro pơla mâu tơdroăng khôp ƀă kuăn pơlê, mơjiâng môi tíu rêh ối lĕm ƀă dêi pó, tơrŭm môi tuăn.