Tung tơdroăng phiu ro, xôk ro Hâi tĭng kân Pâ Xeăng chu chiâng kuăn mơngế hơnăm 2024, kơxê lơ 22/12, teăng mâ khu râ kăn pơkuâ hnê ngăn Đảng ƀă Tơnêi têa, pôa Nguyễn Hòa Bình, Ngế pro xiâm phŏ hnê ngăn tơnêi têa hiăng troh rơkâu Hâi tĭng kân Pâ Xeăng chu chiâng kuăn mơngế ƀă hơnăm nếo 2025 a Hngêi Pâ Xeăng kân Hà Nội, Hngêi khôp kân Tin Lành Việt Nam (peăng Kơnhŏng tơnêi têa) ƀă Vi ƀan tơrŭm môi tuăn kuăn khôp Việt Nam.

Troh lăm pôu ƀă rơkâu Hâi tĭng kân Noel a Vi ƀan tơrŭm môi tuăn kuăn khôp Việt Nam, pôa Nguyễn Hòa Bình tối tung pơla kố nah, Vi ƀan tơrŭm môi tuăn kuăn khôp Pâ Xeăng Việt Nam hiăng ai hên tơdroăng veăng gum kân tung mơjiâng khu tơrŭm môi tuăn tâi tâng hdroâng mơngế, ôh tá xê to tơrŭm môi tuăn tung kuăn khôp Pâ Xeăng mê tơrŭm tá mâu ngế ki ôh tá tiô khôp – ƀai hriâm ki má môi ‘na ivá Việt Nam.

Hiâm mơno tơrŭm môi tuăn tâi tâng hdroâng mơngế hiăng pro ăm tơnêi têa, hdroâng mơngế pin khoh chiâng ó rơdêi ƀă xông tơtêk a’ngêi tâ tung mơ-eăm cheăng a rơxông nếo, rơxông kro mơdrŏng rơdêi, mơnhông mơdêk.

Pôa Nguyễn Hòa Bình tối nhên, tung tơdroăng châ tơƀrê tơdjuôm mê ai tơdroăng veăng gum dêi kuăn khôp Pâ Xeăng, ki rơhêng vâ tối cho dêi Vi ƀan tơrŭm môi tuăn kuăn khôp Pâ Xeăng Việt Nam.