Kơxê măng hnah, lơ 22/12, tung hneăng lăm pôu, pêi cheăng a kong têa Lào Cai, pôa Phạm Minh Chính, Ngế pro xiâm hnê ngăn tơnêi têa ƀă khu râ kăn ngăn cheăng pêi ƀă Khu pơkuâ hnê ngăn cheăng Đảng kong pơlê Lài Cai, mơnhên tơdroăng pêi pro, châ tơƀrê pêi pro hnoăng cheăng mơnhông cheăng kâ – rêh ối pơlê pơla hơnăm 2024 ƀă troăng pêi, hnoăng cheăng tung la ngiâ.

Xông tơpui mơgêi roh pêi cheăng, pôa Phạm Minh Chính, Ngế pro xiâm hnê ngăn tơnêi têa môi tuăn ƀă mâu kăn teăng mâ ‘na mâu tơmeăm ki ai hlâu, roh tơ’lêi hlâu ƀă mâu tơdroăng châ tơƀrê dêi Lào Cai tung hơnăm 2024.

‘Na troăng tơmiât pêi, mơnhên troăng prôk la ngiâ, Ngế pro xiâm hnê ngăn tơnêi têa pơtối hlê plĕng pêi pro, châ tơƀrê pơkâ Hneăng hôp má XIII dêi Đảng, mâu pơkâ, mơgêi, hnê mơhno dêi Tơnêi têa, Khu xiâm kal kí, Khu pơkuâ hnê ngăn cheăng Đảng, Kuô̆k hô̆i, Chin phuh, tung mê ai Pơkâ kơxô̆ 11 dêi Khu xiâm kal kí ‘na troăng pêi la ngiâ mơnhông cheăng kâ – rêh ối pơlê pơla ƀă tơniăn gâk kring tơnêi têa, gâk kring kơpong achê kong tơbăng ƀă kong ngo Peăng Kơnhŏng ƀă Pơkâ Hneăng hôp Đảng ƀô̆ kong pơlê; xúa, pêi pro tro troăng pơkâ pêi, troăng prôk dêi Đảng, troăng hơlâ, luât dêi Tơnêi têa ƀă tơdroăng hnê mơhno, pơkuâ dêi Chin phuh, Ngế pro xiâm hnê ngăn Chin phuh./.