Lối 1 măng tĭng hiăng hluâ, a hngêi khôp kơpong Châu Sơn, cheăm Čư Êbur, pơlê kong kơdrâm Ƀuôn Ma Thuột, kuăn khôp hiăng tơkŭm rơnuâ hbrâ tơdah phiu ro hâi tĭng kân Pâ Xeăng chu chiâng kuăn mơngế. Kơbố pơrá hâk. Ngế ki ‘na krâ pul on, ngế ki ‘na toi kơxái on tơhrik, ngế ki ‘na pro kiâp hmốu, ngế ki ‘nâ mơdâng bo péa, pro inhên rêm kơpê, tĕm ƀăng keo a kiâp hmốu  kân. Pôa Trần Trọng Khánh, kăn pơkuâ thôn 2, cheăm Čư Êbur tối:

“Rêm hơnăm tiô khôi vâi krâ nah mê ngin pro kiâp hmốu xuân môi tiah tâi tâng mâu tơdroăng rơnuâ a troăng kân pơlê kơtâu vâ pro lĕm ăm kế tơmeăm dêi hâi Tĭng kân Noel ƀă tơdrêng amê tung hiâm mơno kố cho pơ-ôu pơ-eăng Pâ Xeăng ƀă pro ti lâi vâ ai hiâm mơno tơrŭm môi tuăn ƀă kuăn khôp Pâ Xeăng xuân môi kuăn pơlê lâp lu kơpong’’.

Mâu hâi hiăng hluâ, mơhé dế tơvâ tơvân krí kơphế, laga kuăn khôp Pâ Xeăng cheăm Ea Tiêu, tơring Čư Kuin, xuân mơdoh chôu vâ rơnuâ tung hngêi ƀă kuăn khôp. Pêi pro i nhên rah xo mâu quả cầu thủy tinh rơnuâ loăng hngó Noel, pôa Nguyễn Phước Thành, ối a thôn 1, cheăm Ea Tiêu, tơring Čư̆ Kuiñ tối ăm ‘nâi:

“Ƀă hơnăm nah mê Noel hơnăm kố phiu ro tâ, xua yă tơmeăm, tối tơdjuôm hngêi ki lâi xuân rơnuâ. Xuân pro kiâp hmốu dêi rêm rơpŏng, kơtâu tung pơlê, rêm hơlâ pŭn troăng pro môi kiâp hmốu. Tối tơdjuôm tơdroăng a hâi kố sôk ro ‘nâng’’.

Xuân tung tơdroăng hâk phiu koh tơdah Pâ Xeăng chu chiâng kuăn mơngế, nâ Trần Thị Anh Thi, ối a bêng Tân Thành, pơlê kong kơdrâm Ƀuôn Ma Thuột tối ăm ‘nâi, kơchơ mơdró tơmeăm Noel hơnăm kố hên túa, hên mơngiơk, hâk ro ăm rêm ngế ki vâ pro kiâp hmốu:

“Á rơnuâ pro Noel tiô khôi vâi krâ nah mâu hơnăm dêi rơpŏng á tê. Hngêi á hiăng ai tơmeăm ki vâ rơnuâ pro a hngêi, troh hâi tĭng kân Pâ Xeăng chu chiâng kuăn mơngế kô xo loăng hngó ki ton vâ xúa, ki lâi ôh tá ai tŭm mê á rôe tơ’nôm. Môi tiah hơnăm kố á hâk mơngiơk hâu mê rôe tơ’nôm mơngiơk hâu tê’’.

Nâ Lê Thị Kim Anh, pơkuâ tíu tê tơmeăm a troăng Lý Thường Kiệt, pơlê kong kơdrâm Ƀuôn Ma Thuột tối ăm ‘nâi, rơnó Noel hơnăm kố, ai hên tơmeăm ki pro ƀă kŏng lĕm mơnâ mâ ngăn, mơhno tơdroăng ki pro inhên, rơkê tung rêm tơmeăm.

“Hơnăm kố tơmối rôe cho rĕng, ki rơhêng vâ tối cho mâu hngêi tê mơdró tơmeăm, kơ koan klêi mê tíu tê kơphế vâi kal rơnuâ vâ tơmối ôu kơphế hâk vâ troh. Drêng kố yă cho kơnâ xua mê pơkâ túa thế rế lĕm’’.

Môi rơnó Pâ Xeăng chu chiâng kuăn mơngế dế vêh tung tơdroăng ki hâk ro, phiu ro dêi kuăn khôp Pâ Xeăng Dak Lak, tơmiât troh môi hơnăm pêng păm tơdroăng phiu ro ƀă hơniâp lĕm.