Hơnăm 2024, tơdroăng gâk kring, kal kí, tơniăn lâp pơlê pơla a Dak Lak châ rak krá, laga xuân ối ai tơdroăng ki pro ôh tá tơniăn. ‘Na gâk kring kal kí tung khu, ai 81 kăn ƀô̆, đảng viên pro xôi pơkâ luât. Tơdroăng hlá đơn, hlá kơthô xăm tối ối tơvâ tơvân. ‘Na rak tơniăn pơlê pơla, tung hơnăm hiăng ai lối 1.130 roh, pro 21 ngế hlâ.

Tơdroăng châ tơƀrê tơdroăng hbrâ mơdât kâ kơhveăm liăn ngân, tơdroăng ki ôh tá lĕm tro, hơnăm 2024 Dak Lak hiăng tơkŭm po séa ngăn tơdroăng pêi pro mâu pơkâ ‘na tơdroăng tơbleăng tơdrăng a 30 tíu. Xông tơpui hnê mơhno hneăng hôp, pôa Nguyễn Đình Trung, Kăn pơkuâ hnê ngăn cheăng Đảng kong pơlê Dak Lak pơkâ mâu râ, mâu kơvâ cheăng pơtối rak krá tơniăn kal kí, tơniăn lâp pơlê pơla, tơleăng teăm tơdrêng mâu tơdroăng ki nếo vâ tơniăn mơnhông cheăng kâ – rêh ối pơlê pơla.

Tơkŭm tơbleăng Khu pơkuâ tơdroăng cheăng Đảng kong pơlê, Khu hnê mơhno tơdroăng cheăng Đảng kong pơlê hnê mơhno tơleăng châ tơƀrê ‘na tơdroăng tơnêi tơníu, tơdroăng hdroâng kuăn ngo, loi tĭng tiô khôp, ôh tá ăm ai mâu ngế ki hêng hôu tơnêi têa, tơtrâ pro pơxúa vâ tơtrâ ‘nhê tơnêi têa.