Ngế ki tro rong châ djâ thâ pơlât a Hngêi pơkeăng drêng 22 chôu kơmăng lơ 18/12 drêng rong a kơpeăng kŏng ‘na hơ-ếo, tro rong a mâ peăng hơ’vá xua mlŏi pơtôu. Ƀok thái pơkeăng Trần Minh Trực - Kăn pơkuâ khoa Chấn thương - Chỉnh hình Hngêi pơkeăng kân kơpong Tây Nguyên, tối ăm ‘nâi, xua tíu tro rong râ ó, mâu ƀok thái pơkeăng thế pôe tah 3 hơ‘răng kŏng a kơpeăng kŏng peăng hơ-ếo dêi ngế tro rong, tơdrêng amê pơlât tíu tro rong a kơpong mâ.

Tơdroăng ivá nôkố dêi o kŭn kơnốu hiăng tơniăn, laga tơ’lêi pơreăng tâ tung châ. Hdrối mê, Hngêi pơkeăng xuân tơdah 4 vâi hdrêng tro rong xua pro xêh mlŏi. Mâu ƀok thái pơkeăng pơchân tối, Têt hiăng vâ troh, vâi hdrêng kô tơ’lêi djâ tung tơdroăng pro mlŏi tung măng pơlê pơla, pro hên tơdroăng ki rơ-iô. Mâu nôu pâ hok tro ƀă hngêi trung hriâm kal thăm pơtâng tối vâ gâk kring tâi tâng ăm vâi hdrêng.