“Têh, drêng mê krôu hlối, kơdrâ hlo ƀok thái pơkeăng Khải tối  hiăng klêh klêa, o ngá kơnốu hiăng klêh klêa klêi mê têa mâ hmếo chiâng lo xêh, tơmiât kâi hơniâp ro  tung hiâm mơno. Tung hiâm mơno tâ môi tiah hơniâp lĕm pá kâi tối, môi tiah tơná vêh ối droh nếo, hơniâp ‘nâng’’.

Mê cho tơdroăng hơ’muăn dêi nâ Nguyễn Thị Thu Dần ối a Ƀuôn Trâp, tơring Krông Ana, kong pơlê Dak Lak drêng rôh apoăng trâm dêi kuăn tung veăng pâ. Nâ Dền tối, prếi mâi nâ hrá ai kuăn hiăng lối 5 hơnăm, xuân hiăng lăm khăm a hên hngêi pơkeăng a Pơlê kong kân Hồ Chí Minh la xuân ôh tá tơƀrê klâi. Plâ 5 hơnăm lăm tăng kuăn, prế on veăng nâ hiăng trâm hên tơdroăng pá kâi kơ khíu tuăn tơmiêt ƀă hlối pá ‘na liăn ngân.

Hơnăm 2023, kơdrâ tâng vâi tối troh tơdroăng “Púi vâ tơdroăng hơniâp’’ dêi hngêi pơkeăng Đại học Y Dược Ƀuôn Ma Thuột, prế on veăng nâ Thu lăm troh mơnúa ngăn dah mơhúa. Ƀă mơhúa khât, hiăng tâ hơniâp ro ƀă prế on veăng nâ drêng hồ sơ dêi nâ châ kĭ. Luâ 2 rôh tâ phôi nâ hiăng chiâng mơ-êa kuăn ki rơmúa.

Xuân môi tiah nâ Dền, prế on veăng Nông Thị Thu, ối a thôn 6a, cheăm Ea Wy, tơring Ea H’Leo, kong pơlê Dak Lak xuân tơngah tơdroăng hơniâp ro ing tơdroăng ki mê. Nâ thu ăm ‘nâi, plâ 11 hơnăm hlối prế on veăng nâ hiăng lăm prôk hên tíu tăng kuăn. Tung pơla mê, nâ hiăng tơkâ luâ 1 hdroh hrik, 3 hdroh tơ’nhiê kuăn ngá sinh hóa, 1 hdroh pâ poluyp a tíu mơjiâng kuăn.

Tơmiêt kô lôi xua tơdroăng cheăng kâ ƀă tuăn ngôa hiăng pá kâi, la kơdrâ ki hơniâp ro kơdrâ troh drêng nâ hiăng mơ-êa tung tơdroăng “Púi vâ tơdroăng hơniâp’’ dêi hngêi pơkeăng Đại học Y Dược pơlê kong kơdrâm Ƀuôn Ma Thuột hơnăm 2023 tung plâ 9 khế mơ-êa, nâ Thu xuân trâm hên tơdroăng rơ-iô ‘na kuăn ngá tung klêa ôh tá bê têa ki rak kuăn, kuăn ngá kŭn tâ khế ki mơ-êa, nŭm nheăn tung pơla mơ-êa, tơ’lêi pro kuăn ngá kơdrâ. Nâ Thu rơrêk lo têa mâ tối:

“Ôh tá tơmiêt kô chiâng kuăn ngá, xua to lâi rôh pro a mâu tíu ki ê tro tơ’nhiê tê, mơhúa rôh kố chiâng. Drêng mơhum klêi o ngá klêh hlêa môi tiah pốu mê, ôh tá loi dêi tơná dế kơbin dêi kuăn’’.

Cho ngế ki rơtế ƀă prế on veăng ki hrá ai kuăn tung tơdroăng “Púi vâ tơdroăng hơniâp’’, Ƀok thái pơkeăng Lê Huy Khải, Ngế pơkuâ tíu pêi cheăng kơjo kum mơjiâng kuăn ‘nĕng IVFMD Ƀuôn Ma Thuột, Hngêi pơkeăng Đại học Y Dược Buôn Ma Thuột ăm ‘nâi, mâu ngế ki hrá ai kuăn lăm tăng troh ki hên to mâu ki tơmiât oh tá ngah, ôh tá loi xua hiăng lăm pôu pơlât a hên tíu la ôh tá hlo tơƀrê. Xua mê, pakĭng tơdroăng pơlât, mâu ƀok thái pơkeăng ối pơlât tá tơdroăng châi dêi ngế ki hrá ai kuăn mê hơlê thế hmiân tuăn, loi khât, kô hlo tơƀrê:

“Xuân hâk tơngăm ƀă mơhúa drêng á châ hlo mâu tơdroăng ki lĕm ro ki tơná a ƀă hngêi pơkeăng rơtế veăng pro vâ ai. Á bú púi vâ tiah kố, pro ti lâi vâ pơtối rơtế khât tâ nếo ƀă mơngế ki pá vâ ai kuăn vâ mơngế ki mê châ ai tơdroăng hơniâp ro môi tiah mê tê”.

“Púi vâ tơdroăng hơniâp’’ cho tơdroăng ki mơjiâng kuăn ngá tung  kơmăi ôh tá êa ăm liăn dêi kơmăi IVFMD ‘măn ăm mâu on veăng ki hrá lơ ôh tá chiâng ai kuăn, ai pơkâ mơjiâng kuăn ngá ‘măn tung klŏng kơmăi la xua tơdroăng cheăng kâ xơpá mê hâi châ pêi pro. Tơdrpoăng châ tơbleăng sap hơnăm 2023, Hngêi pơkeăng Đại học Y Dược Ƀuôn Ma Thuột hiăng kum klêi ăm 6 on veăng, tung mê ai 3 ngế hiăng tơdah xo o ngá ivá mo dâi drêng kot mâ. Tâi tâng kơxô̆ liăn kơjo kum tơdroăng mê lối 1,1 rơtal liăn.

Bok Thái pơkeăng Võ Minh Thành, Ngế pơkuâ Hngêi pơkeăng Đại học Y Dược Ƀuôn Ma Thuột ăm ‘nâi, Hngêi pơkeăng Đại học Y Dược Ƀuôn Ma Thuột xuân dế xo hồ sơ ăm Tơdroăng “Púi vâ tơdroăng hơniâp’’ hơnăm 2024. Hơnăm kố, Hngêi pơkeăng kô kơjo kum 10 on veăng oh tá ai kuăn ‘nâ hrá ai kuăn ai tơdroăng rêh ối xơpá a Tây Nguyên:

“Tơdroăng kố pro pơxúa ăm kuăn pơlê hlối tơtro ƀă troăng hơlâ pêi cheăng dêi Hngêi pơkeăng xua mê ngin kô pơtối rơtế ƀă ƀă mơ-eăm pro ti lâi ăm i tro vâ kuăn pơlê pin châ pơxúa ing hnoăng cheăng dêi Khoa hok kŏng ngê̆ xuân môi tiah kơjo kum khât ‘na liăn ngân’’.

Mâu kơxô̆ liăn tŏng kum ing tơdroăng “Púi vâ tơdroăng hơniâp’’ dêi Hngêi pơkeăng Đại học Y Dược Ƀuôn Ma Thuột hiăng pêi pro ai khât tơdroăng púi vâ dêi môi rơpŏng hngêi hơniâp ro ai kuăn ‘nĕng dêi mâu on veăng ki ôh tá ai kuăn hrá ai kuăn ki tơdroăng rêh ối xơpá a Tây Nguyên. Veăng ‘no hnoăng hnê tơ’nôm thế ai tuăn loi, xiâm ki vâ mơhnhôk hơlêm mâu on veăng ôh tá ai kuăn lơ hrá ai kuăn tung tơdoăng tơná lăm tăng kuăn.