Tung ƀai pơchuât dêi tơná, pôa Phạm Minh Chính, Ngế pro xiâm hnê ngăn Chin phuh vêh tối nhên troăng tơmiât môi tiah môi, tơdrăng ‘na mơnhông krá tơniăn ƀă tơhrâ dêi Việt Nam cho ôh tá la lâi tŏng gum môi tuăn tơdroăng rêh ối, pêi pro tơdâng tơ’mô pơlê pơla ƀă rak vế kong prâi tơnêi tơníu vâ pêi tiô tơdroăng ki thăm mơdêk cheăng kâ môi pâ xêh.

Ngế pro xiâm hnê ngăn tơnêi têa tối nhên, rêm tơdroăng pêi pro dêi pin nôkố pơrá kô pơkâ hnoăng cheăng dêi mâu rơxông xo ah hmôi. Ƀă túa tơmiât mê, Việt Nam tơhrâ kô mơ-eăm tâi ivá tơná rơtế ƀă mâu kong têa, khu tơrŭm cheăng, kong têa ê tơhrâ mơ-eăm pêi pro tơdroăng pơkâ mơ’no trếo ‘mêi a hdrối hơnăm 2050, veăng gum ăm tơdroăng mơnhông dêi môi plâi tơnêi ngiât, krúa, lĕm, krá tơniăn, xua tơdroăng tung la ngiâ dêi mâu rơxông xo ah hmôi.