Pôa Tô Lâm, Kăn xiâm pơkuâ hnê ngăn Đảng mơnhên tối khât mâu tơdroăng pêi tơƀrê ki Mông Cổ hiăng pêi châ tung pơla a chê kố. ‘Na tơrŭm cheăng Việt Nam - Mông Cổ, Kăn xiâm pơkuâ hnê ngăn Đảng tối ro hlo mâu tơdroăng mơnhông tung tơrŭm cheăng pơla péa pâ tung 70 hơnăm hdrối, ing rôh ki mơjiâng tơrŭm cheăng tơpui kâ; mơnhên tối tơdroăng ki péa pâ tơkŭm po Hneăng hôp 19 Vi ƀan tơrŭm Chin phuh Việt Nam - Mông Cổ.

Tơdroăng cheăng kố ai pơxúa kal khât tung tơdroăng mơhno ki hlê plĕng tơdjuôm khu râ xiâm ƀă Tối tơbleăng tơdjuôm ‘na mơjiâng tơrŭm cheăng tơnêi têa tơrŭm tŭm têk Việt Nam - Mông Cổ. Pôa Tô Lâm, Kăn xiâm pơkuâ hnê ngăn Đảng pơkâ thế tung tơdroăng tơrŭm cheăng, mê péa pâ kal thăm mơdêk tâ nếo tơrŭm cheăng kal kí, gâk kring, cheăng lêng, cheăng kâ - tê mơdró, túa lĕm tro, trâm mâ kuăn pơlê; mơdêk tơrŭm ai pơxúa, tơƀrê tung mâu kơvâ cheăng tơtro ƀă ki ai hlâu, ki rơdêi dêi rêm to tơnêi têa.