Klêi kơ’nâi lối 9 hơnăm tơbleăng mơjiâng thôn pơlê nếo mơdêk cheăm Ea Kao hiăng pêi klêi 19/12 tơdroăng pơkâ pêi klêi thôn pơlê nếo mơdêk tiô pơkâ. Tơdroăng ki pêi klêi thôn pơlê nếo mơdêk dêi cheăm châ mơhno nhên a mâu kơvâ cheăng môi tiah: tơdroăng rêh ối, tơmeăm khoăng, liăn ngân, hiâm mơno dêi kuăn pơlê ôh tá la lâi pơtê châ mơdêk; pêi châ liăn rêm ngế châ lối 60 rơtuh liăn tung môi hơnăm.

Cheăm Ea Kao cho 1 tung 4 to cheăm dêi pơlê kong kơdrâm Ƀuôn Ma Thuột châ mơnhên cheăm pêi klêi thôn pơlê nếo mơdêk tung rôh kố. Mơdêk tâi tâng kơxô̆ cheăm thôn pơlê nếo mơdêk dêi pơlê kong kơdrâm tâk troh 5 to cheăm. Pôa Vũ Văn Hưng, Kăn hnê ngăn Vi ƀan pơlê kong kơdrâm Ƀuôn Ma Thuột ăm ‘nâi, pơlê kong kơdrâm mơ-eăm troh tâi hơnăm 2024 pơlê kong kơdrâm kô ai 8/8 to cheăm pêi klêi thôn pơlê nếo mơdêk ƀă 1 to cheăm pêi klêi thôn pơlê tiô túa.