Cho môi tung mâu cheăm ki pêi chiâk pêi deăng dêi tơring Krông Ana, kong pơlê Dak Lak, cheăm Bình Hoà trâm hên tơdroăng pá vâ rak vế, pêi pro hnoăng heăng mơjiâng thôn pơlê nếo, malối ‘na troăng prôk a thôn pơlê. Ƀă hiâm tuăn khŏm mơ-eăm dêi Đảng uỷ, khu kăn hnê ngăn cheăm ƀă hiâm mono môi tuăn dêi kuăn pơlê, cheăm Bình Hoà hiăng châ mơnhên tối châ plah thôn pơlê nếo a hơnăm 2017. Troh nôkố, cheăm dế pơtối pêi pro tŭm, thăm mơdêk mâu tơdroăng ki vâ pêi pro troh a kơlo cheăm châ plah inâi cho thôn pơlê nếo a kơlo a’ngêi ó tâ. Jâ Nguyễn Thị Hiền Trinh, Kăn hnê ngăn Vi ƀan Măt trâ̆n Tơnêi têa cheăm Bình Hoà tối ăm ‘nâi:

‘’Drêng mơjiâng hnoăng cheăng thôn pơlê nếo mê rêm hơnăm khu kăn ƀô̆ hnê mơhnhôk, măt trâ̆n pơrá tơkŭm po, hnê tơdjâ a thôn, ki xiâm cho vâ hnê tối ăm kuăn pơlê châ ‘nâi, châ hlo nhên hnoăng ki kal dêi tơdroăng rak vế, pêi pro tơdroăng ăm ga tiah lâi, mê ki hên kuăn pơlê hiăng vâ môi tuăn, veăng tơlo dêi liăn ngân, hnoăng cheăng pêi ƀă hên mâu tơdroăng ki ê. Troh nôkố hiăng ai 99% mâu troăng prôk a thôn pơlê hiăng châ tôh ƀê tong tâi tâng’’.

Ƀă cheăm Ea Sol, tơring Ea Hleo, kong pơlê Dak Lak, mot tung hnoăng mơjiâng thôn pơlê nếo ing hơnăm 2011, tung lâp tơring ki kân rơdâ kố, kuăn pơlê preăng prêh, tơdroăng pêi lo kế tơmeăm liăn ngân dêi kuăn pơlê bu iâ, troăng prôk xuân ta hâi châ mơnhông, tung pơla mê, kơxô̆ liăn ki mơ’no gum ôh tá hâi teăm hên. Đảng ƀô̆, khu kăn hnê ngăn cheăm Ea Sol mơnhên ăm ‘nâi, ki kơjo má môi cho mơdêk tơdroăng rêh kâ ối, tơdroăng pêi lo liăn ngân dêi kuăn pơlê, ing mê, vâ ai ivá thăm módêk hnoăng cheăng dêi kuăn pơlê vâ mơjiâng thôn pơlê nếo.

Mâu râ uỷ đảng, khu kăn hnê ngăn, rêm râ, kơvâ cheăng thăm mơdêk tơdroăng pơtâng tối, hnê khĕn, mơhnhôk kuăn pơlê xúa ki rơkê plĕng dêi khoa hok kih thuât ‘mot tung pêi cheăng kâ, pêt hdrê loăng, păn mơnăn mơnôa, kơpôu ro, vâ tơdroăng cheăng kâ châ tơtêk hên tâ. Pôa Hoàng Trở, Kăn hnê ngăn khu kuăn pơlê pêi chiâk deăng cheăm Ea Sol tối ăm ‘nâi, troh mơ’nui hơnăm 2023, cheăm hiăng châ mơhên cho cheăm thôn pơlê nếo:

‘’Pơhlêh tơdroăng pêt hdrê loăng, djâ mâu hdrê loăng ki kơnâ liăn ƀă mơhnhôk kuăn pơlê tơkŭm pêt hên, môi tiah: loăng sầu riêng, mắc ca, plâi treăng hương chi ƀă hên hdrê loăng ki ê vâ pro pơxúa, pêi lo liăn hên tâ’’.

Ƀă hên túa cheăng pêi pro ki rơkê plĕng, rĕng tơdrêng, tơtro ƀă tơdroăng ki ai păng ‘nâng dêi pơlê cheăm, tơring, malối pơtối mơdêk hnoăng pơkuâ ngăn, djâ troăng ahdrối dêi khu râ pơkuâ ngăn cheăng Đảng ƀă mâu ngế đảng viên xuân athế djâ troăng pêi pro ahdrối, troh nôkố lâp kong pơlê Dak Lak hiăng ai 78/151 to cheăm châ plah inâi thôn pơlê nếo, 5 to cheăm châ plah thôn pơlê nếo, 1 pơlê kong kơdrâm châ plah inâi thôn pơlê nếo. Ki xiâm hnoăng cheăng pêi troh tâi hơnăm 2025, Dak Lak kô ai 100 to cheăm, 4 to tơring cihâ plah inâi thôn pơlê nếo.

Vâ khoh pêi kêi hnoăng cheăng kố, pôa Nguyễn Đình Trung, Ngế cheăng tung Khu xiâm Đảng, Kăn pơkuâ hnê ngăn Đảng kong pơlê Dak Lak tối ăm ‘nâi, kong pơlê pơtối mơdêk hên tâ nếo tuăn hiâm ki hloh rơkê, mơdêk pôu râng hnoăng cheăng, tơdroăng cheăng pêi, hnoăng ki râng tơdjâ dêi khu râ uỷ, khu hnê ngăn rêm râ ƀă tâi tâng khu râ cheăng kal kí tung mơjiâng thôn pơlê nếo.

‘’Kong pơlê hiăng ai pơkâ nhên tơdroăng cheăng, cheăm ki lâi ôh ta hâi châ kâi pêi pro tơdroăng cheăng ki nhên ăm tơrêm cheăm vâ ing mê, ai troăng hơlâ ki mơjiâng mâu hnoăng pêi mê vâ khoh châ chiâng pêi pro klêi hnoăng cheăng pơcháu. Ki xiâm dêi tơdroăng kố cho vâ mơnhông pêi cheăng kâ, mơdêk rêh ối pơlê pơla, rak tơniăn ăm tơdroăng mơjiâng thôn pơlê châ lĕm tơniăn tâ, rêh kâ ối dêi kuăn pơlê a mâu pơlê cheăm thôn pơlê thăm châ mơdêk a kơlo ki a’ngêi tâ, hnoăng pơkuâ ngăn kuăn pơlê, hnoăng cheăng kal kí a pơlê cheăm, tơring, pơlê kong kơdrâm châ mơdêk rơdêi hên tâ’’.

Pơtối mơdêk hnoăng cheăng dêi khu râ uỷ đảng, hnoăng ki pơkuâ, tơdjâ tơdroăng cheăng rơkê dêi khu kăn hnê ngăn ƀă tơdroăng veăng pêi pro dêi tâi pơlê pơla tung hnoăng heăng tơ’noăng ‘’Dak Lak veăng tơdjuôm ivá mơjiâng thôn pơlê nếo’’, mâu kơpong thôn pơlê a kong pơlê Dak Lak rế hía thăm rế châ mơnhông tơtêk, vêh pơtroh ăm tơná kuăn pơlê ai tơdroăng phâi tơtô, hơniâp ro niân nok tâ.