Tơdroăng ki kal tơpui tung rôh hôp, jâ Nguyễn Thị Thanh, Kăn xiâm phŏ hnê ngăn Kuô̆k hô̆i tối nhên Vi ƀan pơkuâ cheăng Kuô̆k hô̆i tối mơno khât ƀă rơkâu tơdroăng ki lĕm troh mâu thái cô hơnăm hiăng krâ, mâu kăn Kuô̆k hô̆i hiăng ƀă dế pêi cheăng tung kơvâ hnê hriâm ƀă vâ chê 1,6 rơtuh ngế thái cô, kăn ƀô̆ cheăng rak ngăn hnê hriâm a rêm tíu tung lâp tơnêi têa. 

Mâu kăn tối vâ môi tuăn ƀă tơdroăng ki kal thế pơkâ Luât Thái cô vâ pê klêi tơdroăng mơjiâng luât ‘na thái cô, hlối ai pơkâ luât ki krê xêh vâ mơjiâng ƀă mơnhông khu thái cô; tơkâ luâ tơdroăng pá tơvâ tơvân tung rak ngăn tơnêi têa ‘na thái cô nôkố. Tiô pôa Trần Văn Thức, khu kăn Thanh Hóa, tơdroăng rah xo mơngế cheăng pro thái cô tung mâu hngêi trung tơnêi têa, nôkố dế pêi pro tiô pơkâ tơdjuôm ‘na tơdroăng rah ƀiên chê̆, kố cho tơdroăng ki ôh tá tro pro hên tơdroăng chiâng ai tíu ki ‘nâ rơlối thái cô, tíu ki ‘nâ ôh tá tŭm thái cô hnê, ôh tá chiâng tơkŭm vâ hnê hriâm mâu môn ki pơkâ thế hnê tung tơdroăng hnê hriâm phôh thong hơnăm 2018.