Kong Kon Tum kơpong pêt sâm Ngọc Linh vâ chê 32 rơpâu ha a péa tơring Đăk Glei ƀă Tu Mrông (dâng 17 rơpâu ha kơpong pêt xiâm ƀă 15 rơpâu ha kơpong ki ôh tá pêt xiâm). Pôa Hồ Công Vũ, kăn phŏ pơkuâ ƀơrô cheăng Xúa ƀă Mơnhông pêt kong, Chi cục Khu rak ngăn loăng pơlái kuăn kiâ kong kong pơlê Kon Tum ăm ‘nâi, hdrối nah, tơdroăng ki mơnhông kơpong pêt sâm Ngọc Linh trâm hên xơpá, tơvâ tơvân.

Xiâm kối cho lối tơdế ƀăng tơnêi pơkâ pêt Sâm Ngọc Linh ối tung kơpong rak vế kơtăng dêi kong ki chiâng xêh, ôh tá ăm phêp ko ‘nhiê pêt tơmeăm ki ê hlối tơdjâk troh mâu pơkâ luât tơnêi tơníu, pêt kong. Tiô pôa Hồ Công Vũ, tơvâ kố hiăng châ Luât Tơnêi 2024 tŏng gum, pro tíu luât vâ kuăn pơlê, khu mơdró kâ, khu kăn pơkuâ kong pơlê, tơring cheăm mơnhông kơpong pêt sâm Ngọc Linh.

“Kong pơlê Kon Tum hiăng hên xôh pâ thế Tơnêi têa mê pơla hdrối kố nah, Troăng 248 Luât Tơnêi hơnăm 2024 hiăng ăm phêp pêt pơkeăng pá kơdâm loăng ki chiâng xêh. Tiô tối hdrối Chin phuh dế Pơkâ ‘na mơnhông pêt pơkeăng pá kơdâm loăng, Pơkâ kố hiăng ‘mêi pơhlêh, xo rơkong tơpui tối rôh má 3. Cho luât vâ kuăn pơlê pêt sâm Ngọc Linh pá kơdâm loăng tối tơdjuôm, kong ki chiâng xêh tối krê mê hiăng tŭm tơdroăng”.

A kong pơlê Dak Nông, pôa Hồ Văn Mười, Kăn hnê ngăn Vi ƀan kong pơlê tối rơdêi, Luât tơnêi 2024 hiăng pro luât, po rôh tơ’lêi hlâu vâ kong pơlê mơdêk rơdêi mơnhông chăng kâ a ƀăng tơnêi 254 rơpâu ha kong, châ vâ chê 40% tâi tâng ƀăng tơnêi kong ki chiâng xêh dêi kong pơlê. Mâu pơkâ nếo ‘na pơkâ yă ƀă ăm mung tơnêi kong kô gum pơkuâ tơƀrê kong kế loăng, malối cho kong ki chiâng xêh ƀă kong rak kơnhŏng têa drêng mơnhông pêt tơmeăm pá kơdâm loăng.

Kong pơlê Dak Nông dế hnê mơhno mâu khu râ, kơvâ cheăng, khu kăn pơkuâ mâu tơring tơbleăng kơtăng mâu hnoăng cheăng vâ rĕng ăm Luât Tơnêi 2024 mot xúa khât, tŏng gum mâu tơdroăng ki kal pêi pro tơdrêng xuân môi tiah ton xŏn dêi kong pơlê.

“Luât Tơnêi cho tơdroăng tơkôm hên dêi kuăn pơlê tung lâp tơnêi têa tung mê ai Dak Nông. Luât ai mâu tíu pơhlêh gá tro, xúa tung tơdroăng rêh ối. Kố cho rôh tơ’lêi ăm Dak Nông, Tây Nguyên, kuăn pơlê mơnhông cheăng kâ malối cho tơdjâk troh tơnêi pêi chiâk deăng pêt kong”.

Kơpong Tây Nguyên ai vâ chê 2,6 rơtuh ha kong, tung mê dâng 2,2 rơtuh ha cho kong ki chiâng xêh. Luât Tơnêi 2024 châ kuăn pơlê, khu mơdró kâ ƀă khu kăn pơkuâ mâu kong pơlê mơnhên tối khât tung tơdroăng ki pro tíu luât vâ tŏng gum mâu xơpá, tơvâ tung tơdroăng mơnhông cheăng kâ a tơnêi pêt kong, malối cho pêt tơmeăm pá kơdâm loăng kong ki chiâng xêh. Lối rơtuh ha châ mơnhông kô pro ivá kân vâ mâu kong pơlê Tây Nguyên châ mơnhông.