Khu tơrŭm Mơdró kâ Mih – APEC cho môi túa tơmiât tung la ngiâ châ xing xoăng xua khu kơvâ cheăng ƀă kơmăi kơmok ai tíu pêi cheăng a Mih ƀă hiăng veăng tung hên hơnăm tung APEC. Teăng mâ mâu khu mơdró kâ Mih lo ing hên kơvâ cheăng phá dêi rơpó ƀă ki hên pơrá ai tơdroăng tơkêa ‘no liăn cheăng a Việt Nam.

Kăn xiâm hnê ngăn tơnêi têa mơnhên tối tơrŭm pơla Việt Nam ƀă Mih ôh tá la lâi pơtê po rơdâ ƀă mơnhông tơkâ luâ tơdroăng pơkâ klêi kơ’nâi vâ chê 30 hơnăm pơhlêh tơrŭm cheăng ƀă lối 1 hơnăm mơdêk tơrŭm cheăng tâk troh a kong têa tơrŭm cheăng tung la ngiâ tŭm têk. Kăn xiâm hnê ngăn tơnêi têa tối rơdêi Việt Nam dế ôh tá la lâi pơtê pro klêi tơdroăng ‘no liăn cheăng tê mơdró tiô troăng ki nhên, tơdrăng, tơniăn, tơtro ƀă troăng pơkâ lâp plâi tơnêi vâ tơ’mot ‘no liăn cheăng. Tung pơla pơhlêh cheăng kâ lâp plâi tơnêi, kăn xiâm hnê ngăn tơnêi têa ăm ‘nâi Việt Nam púi vâ tơrŭm krá ƀă mâu khu mơdró kâ Mih ƀă kơpong APEC tung mâu kơvâ cheăng kơmăi kơmok rơxông nếo ƀă pơhlêh nếo tơmiât rơkê; on tơhrik vêh pro ƀă mơnhông ngiât.