A rôh leh, Kăn hnê ngăn kong pơlê Kon Tum khĕn kơdeăn kơvâ ngăn hnê hriâm ƀă hnê mơjiâng tuăn ngôa rơkê rơtế ƀă thái cô dêi kong pơlê tung mâu hơnăm hdrối hiăng tơbleăng, pêi tơdrêng mâu tơdroăng cheăng, troăng hơlâ ‘na pơhlêh nếo tung tâi tâng hnê hriâm ƀă hnê mơjiâng tuăn ngôa rơkê a kong pơlê.

Ki tơƀrê cho pơtối rak vế krak tơdroăng hnê tơ’nôm râ mầm non ăm vâi hdrêng 5 hơnăm, hnê râ má môi ƀă hnê tơ’nôm râ má péa; mâu tơdroăng mơhnhôk tơ’noăng hnê ƀă hriâm, mơhnhôk hriâm, hnê mơhnhôk hriâm rơkê, mơjiâng pơlê pơla vâ tơmâng khât ‘na tơdroăng hnê hriâm.

Rôh kố, thái Thái Khắc Hoà, Ngế pơkuâ Ƀơrô hnê hriâm ƀă hnê mơjiâng tuăn ngôa rơkê pơlâ kong kơdrâm Kon Tum hâk tơngăm châ tơdah xo inâi Thái hnê rơkê xua Kăn xiâm hnê ngăn tơnêi têa pơxá ăm. Khu xiâm ngăn hnê hriâm ƀă hnê mơjiâng tuăn ngôa rơkê diâp ƀâng kơdeăn khĕn ăm 2 ngế thái cô kơhnâ rơkê hơnăm 2024 a kong pơlê Kon Tum; Kăn xiâm hnê ngăn Vi ƀan kuăn pơlê kong pơlê Kon Tum ăm hlá cơ tơ’noăng hơnăm hriâm 2023-2024 ăm 16 khu pú hên.