Hâi lơ 15/11, Khu kăn pơkuâ hnê ngăn Đảng Dak Nông tơkŭm Hôp tơbleăng 6 tơdroăng pơkâ dêi khu kăn pơkuâ hnê ngăn Đảng kong pơlê ‘na tơdroăng cheăng kăn ƀô̆. Ing mê, Khu kăn pơkuâ hnê ngăn Đảng kong pơlê Dak Nông pơkâ ăm pơtê pro Ngế pơkuâ hnê mơhnhôk cheăng Đảng kong pơlê ƀă jâ Hà Thị Hạnh - Ngế pơkuâ hnê mơhnhôk cheăng Đảng kong pơlê, Kăn hnê ngăn Vi ƀan Măt trâ̆n tơnêi têa Việt Nam, riân sap hâi lơ 20/11/2024. Pôa Lê Văn Chiến, Kăn phŏ hnê ngăn Vi ƀan kuăn pơlê kong pơlê rah thế, xoăng hnoăng cheăng, pôk Ngế pơkuâ mơhnhôk cheăng Đảng kong pơlê Dak Nông.

Xuân a hneăng hôp, khu kăn pơkuâ hnê ngăn Đảng kong pơlê Dak Nông hiăng tơbleăng mâu pơkâ ‘na rah lăm cheăng, mơhno pôa Nguyễn Văn Thành, kăn phŏ hnê mơhnhôk cheăng Đảng kong pơlê veăng pêi cheăng tung Khu kăn, khu pơkuâ cheăng, pro Ngế phŏ pơkuâ hnê ngăn Đảng tơring Dak Song, hneăng hơnăm 2020-2025. Rah lăm pêi cheăng, pôk pôa Lê Ngọc Quang pro Ngế pơkuâ Tíu xiâm ngăn túa lĕm tro tơ’noăng ivá ƀă Ôm hyô Dak Nông rak hnoăng cheăng pro phŏ hnê mơhnhôk cheăng kal kí dêi Đảng kong pơlê riên sap hâi lơ 20/11/2024.

Tơdroăng rah pêi cheăng, pôk pôa Phạm Đức Lộc, Phŏ pơkuâ hnê ngăn Đảng tơring Dak Song pro Ngế phŏ hnê mơhnhôk cheăng Đảng kong pơlê sap hâi lơ 20/11/2024. Pơkâ ton hơnăm pro kăn phŏ hnê mơhnhôk Đảng kong pơlê ƀă pôa Lê Sỹ Tuân riân sap hâi lơ 23/10/2024 ta troh drêng troh hơmăm pơtê cheăng xua hiăng krâ.