Tung tơdroăng ki trâm mâ kân krip, lĕm ro, pôa Phạm Minh Chính hâk phiu koh tơdah 60 ngế thái cô ki rơkê kơhnâ, mâu ngế ki hiăng ai hên hnoăng veăng gum mơnhông hên má môi ăm hnoăng hnê hriâm ƀă hnê mơjiâng tuăn ngôa rơkê dêi tơnêi têa, teăng mâ ăm 1 rơtuh 600 ngế thái cô tung lâp tơnêi têa. Ngế pro xiâm hnê ngăn tơnêi têa tối nhên, prôk tiô troăng hơlâ dêi chal nếo, hnoăng cheăng hnê hriâm pơtối cho troăng prôk ki apoăng; hnoăng cheăng hnê hriâm ƀă hnê mơjiâng tuăn ngôa rơkê dêi tơnêi têa athế khŏm mơ-eăm pơhlêh nếo ki nhên, ki kal ƀă hên kơvâ luâ tâ hdrối nah nếo, athế châ mơjiâng ki păng ‘nâng dâi khât ƀă hloh hlê rơkê plĕng tiô tơdroăng ki nếo, ki lĕm tro.

Vâ khoh kâi châ chiâng pêi pro hnoăng cheăng ki hơngăm hơngo kố, Ngế pro xiâm hnê ngăn pơkâ thế mâu khu râ, kơvâ cheăng, kong pơlê, pơlê kong kân pơtối tŏng gum, rak ngăn ăm hnoăng cheăng hnê hriâm ƀă hnê mơjiâng tuăn ngôa rơkê; Mơhnhôk ƀă xúa châ tơƀrê khât kuăn mơngế, liăn ngân, kế tơmeăm, mơnhông khŏm châ ai tŭm mâu tơmeăm khoăng ki vâ xúa tung hngêi trung; pơtối mơjiâng ƀă mơnhông túa lĕm tro dêi tơdroăng hnê hriâm a hngêi trung. Thăm mơdêk tuăn ngôa ki rơkê dêi mâu thái cô, rêm ngế thái cô athế djâ troăng ahdrối ‘na rêh ối, pêi cheăng, ai hiâm tuăn kơhnâ, tơdrăng, rơkê, mơjo pâ dêi hnoăng cheăng-hơ-ui pâ kơ kuăn mơngế, veăng tơdjuôm ivá mơjiâng ăm rơxông la ngiâ dêi tơnêi têa mơnhông tung rêm kơvâ cheăng.