Kô cho grup ngăn pơkeăng ki má môi dêi Nhuk, pêi cheăng ôh tá xo rơkâ, ai tá đăi hok y khoa, mâu hngêi pơkeăng, mâu khu tơrŭm cheăng ki pơxúa ăm pơlê pơla tung lap tơnêi têa. Tơbleăng a rôh tơdah, pôa Lê Thành Long, Ngế pro xiâm phŏ hnê ngăn tơnêi têa ăm ‘nâi, tơdroăng tơrŭm cheăng pơla Việt Nam Nhuk dế tung pơla mơnhông tơƀrê. Mâu tơdroăng tơkêa bro tơrŭm cheăng ƀă Nhuk ai pơxúa tơƀrê ƀă mâu tơdroăng cheăng rak ngăn ivá ăm kuăn mơngế Việt Nam. Veăng ‘no hnoăng a tơdroăng ăm hlo tơƀrê tơdjuôm mê ai mâu tơdroăng mơ-eăm dêi grup IHW ƀă pôa Takagi Kuninori.

Ngế pro xiâm phŏ hnê ngăn tơnêi têa hâk mơnê Grup IHW tăng ‘nâi plĕng, tơbleăng mâu tơdroăng tơkêa bro ‘no liăn cheăng ƀă mơjiâng hngêi pơkeăng tiô pơkâ dêi Nhuk a Việt Nam; púi vâ mâu tơdroăng tơkêa bro IHW kô pêi cheăng tơƀrê, kum kuăn pơlê Việt Nam ai rôh châ rak ngăn ivá ƀă kŏng ngê̆, pơkeăng pơlât tiô túa nếo, loi nhoăm, ngăn krâu khât.