Dế nôkố kong pơlê dế khŏm mơ-eăm troh tâi hơnăm 2025 ah kô tah lôi tâi tâng hngêi pơtân, hngêi xi kơchoh. Tiô tơdroăng mơnhên ngăn dêi rêm tơring, cheăm, dế nôkố, lâp jong pơlê Dak Lak xuân u ối 9.569 rơpŏng dế trâm hên xahpá ‘na hngêi ối. Pôa Nguyễn Hoàng Giang, Kăn pơkuâ ngăn ‘na cheăng pê-mô đô̆i rong ƀă rêh ối pơlê pơla dêi kong pơlê Dak lak tối ăm ‘nâi, rak vế, pêi pro hneăng tơ’noăng “Tơdjuôm ivá xut tah lôi hngêi pơtân, hngêi xi kơchoh tung lâp tơnêi têa tung hơnăm 2025” xua Ngế pro xiâm hnê ngăn Chin phuh hnê mơhnhôk, kong pơlê Dak Lak hiăng tí tăng lăm ngăn, chêh tối, ‘nâi nhên kơxô̆ toăng hngêi ki pơtân, hngêi ki xi kơchoh, vêh mơnhên mâu hngêi trăng ki mê vâ chêh tối, tơbleăng mơnhên vâ ai troăng hơlâ tŏng gum ‘mâi rơnêi, lơ mơjiâng pro nếo.

Kong pơlê xuân hiăng ai pơkâ hnoăng cheăng, túa cheăng ki rak vế, pêi pro tah lôi hngêi pơtân, hngêi xi kơchoh tung kong pơlê tro tiô tơdroăng, vâ pôi ta ai xếo hngêi ki tơ’nhiê tơ’nhĕng, hngêi ki pơtân tung pơlê pơla, cheăm bêng.