Rơpŏng nâ Đinh Thị Phước, kot mâ hơnăm 1996, ối a pơlê Đăk Kjông, cheăm Lơ Ku, tơring Kƀang, kong pơlê Gia Lai hdrối nah cho rơpŏng kơtiê ôh tá ai tơnêi pê kâ. Prế ngế on veăng ai 2 ngế kuăn ối tu xĭn, rêh ối kơnôm 5 sao tơnêi nôu pâ ăm vâ lăm pêi cheăng vâi. Tơdroăng rêh ối trâm hên xơpá.   

Hlo tơdroăng rêh ối dêi rơpŏng hngêi nâ, Chi ƀô̆ pơlê Đăk Kjông hiăng xing xoăng đảng viên troh lăm hnê, mơhnhôk nâ Phước veăng xo rak ngăn 12 ha kong; hnê nâ rak ngăn kong tro kih thuât. Sap ing mê, nâ pêi cheăng châ tơniăn 36 rơtuh liăn/hơnăm sap hơnăm 2014 nah troh nôkố. Pa kơdâm kong, drêng ối kŭn, nâ pêt tơ’nôm mâu prá vâ tăng tơ’nôm kơxô̆ liăn pêi lo. Kơnôm kơhnâ pêi cheăng, troh nôkố prế on veăng nâ Phước hiăng rôe tơ’nôm 2 ha tơnêi, tiô tối hdrối mơ’nui hơnăm kố mơni kô hluăn kơtiê:

"Rơpŏng hngêi á kơtiê, mơnê kăn ƀô̆ hiăng tơmâng veăng gum. A kô mơ-eăm pêi cheăng kâ, ‘nâi kơdĭng tơmeăm vâ rôe tơnêi pro hngêi ƀă mơnhông cheăng kâ tung rơpŏng hngêi. Tơdroăng rêh ối dêi rơpŏng a nôkố tâng vâ pơchông ƀă hdrối nah tơniăn hên tâ’’.

Pơlê Đăk Kjông, cheăm Lơ Ku, tơring Kƀang, kong pơlê Gia Lai, ai 84 rơpŏng kuăn pơlê ƀă 426 pơ’leăng mâ mơngế. A kố, 95% ngế kuăn pơlê cho mơngế Bơhnéa. Hdrối nah, tung kơpong long hngêi kơmăi on tơhrik An Khê- Ka Nak. Hơnăm 2009, pơlê lăm ối a ‘ngêi tâ, kơtăn tíu ton 14km. Tơnêi 8 sao ƀă ai 1,7 sao klâng pê 2 rơnó châ xoăng ăm rêm rơpŏng, apoăng kuăn pơlê trâm hên pá. La kơnôm ai kăn hnê mơhno pơkuâ djâ nhên khât dêi chi ƀô̆ thôn ƀă khu ngăn thôn, kuăn pơlê chôa pro klêi hngêi trăng lĕm ƀă ‘no ivá veăng rơtế ƀă tơnêi têa bro troăng ƀê tong ƀă pro hngêi kuăn pơlê tơkŭm hôp. Kuăn pơlê pro dêi kơnâng, bo cheăng hlối rơtế ƀă dêi rơpó rak tơniăn troăng pơlê, krúa lĕm.

Ôh tá xê to ti mê, kuăn pơlê Đăk Kjông ối châ kơjo kum ăm mung liăn ăm ro păn ƀă hên tơmeăm ki ê vâ mơdêk pêi lo liăn. Kơ’nâi hên hơnăm mơ-eăm, troh khế 11/2014, pơlê Đăk Kjông kô châ mơnhên tối pơlê cheăng kâ rêh ối tiô túa nếo, thôn pơlê nếo, hdró ki kal pơ’lêh tơná dêi tâi tâng kuăn pơlê. Pôa Đinh Bới, Kăn hnê ngăn chi ƀô̆ pơlê Đăk Kjông, cheăm Lơ Ku tơring Kƀang, kong pơlê Gia Lai tối ăm ‘nâi:

"A cho kăn hnê năn chi ƀô̆, mê tơdroăng axoăng đảng viên gum mâu kơtiê, rơpŏng kơtiê xơpá á hiăng hnê tối ăm mâu rơpŏng  kuăn pơlê thế mơ-eăm pêi cheăng kâ, tăng tơ’nôm liăn ăm rơpŏng hngêi, vâ tơdroăng rêh ối tơniăn, phâi tơtô tâ, rĕng hluăn kơtiê. Kơhnâ mơnhông cheăng kâ ăm rơpŏng hngêi’’.

Mâu hơnăm hdrối mê hía nah, tơdroăng mơjiâng pơlê cheăng kâ rêh ối tiô túa nếo mơjiâng thôn pơlê nếo tung kơpong hdroâng kuăn ngo tiô tơdroăng Pơkâ kơxô̆ 12 hâi lơ 13/2/2018 dêi khu kăn pơkuâ hnê ngăn Đảng kong pơlê Gia Lai, rêm hơnăm Đảng ủy cheăm Lơ Ku, tơring Kƀang troh mơjiâng pơkâ, tơdroăng pơkâ mơnhông cheăng kâ nhên tiô mâu pơkâ, tơring Kƀang xuân mơjiâng pơkâ tơbleăng inhên tiô mâu pơkâ ki tơring pơcháu.

Đảng ủy  pơcháu, Đảng ủy axoăng kăn ƀô̆, kŏng chức ƀă mâu khu tơrŭm cheăng khu grup vâ pơkuâ ngăn tơrêm thôn, pơlê, malối hnê mâu rơpŏng kuăn pơlê ki kơtiê chêh inâi vâ hluăn kơtiê. Kuăn pơlê châ hmâng hnê kih thuât pêt loăng plâi, păn mơnăn ƀă hriâm túa pêi cheăng ki nếo  tro tung pêi chiâk.

Cheăm Lơ Ku, tơring Kƀang, kong pơlê Gia Lai xuân pêi tơdrêng hên tơdroăng dêi tơnêi mê cho mơnhông cheăng kâ – rêh ối  kơpong kuăn ngo ƀă tơdroăng xăm kơtiê krá tơniăn, gum kuăn pơlê hdrê, phon rơvât, mơnăn păn ƀă kơmăi kơmok ăm kuăn pơlê tơbleăng pêi. Đảng viên châ axoăng lăm troh a tơrêm pơlê vâ hôp ƀă mâu chi ƀô̆, hnê tối, gum mâu rơpŏng kơtiê. Mơhé ối hên pơloăng mơnúa, tơdroăng xăm kơtiê a pơlê cheăm hiăng hlo tơƀrê, chôa kum kuăn pơlê Bơhnéa mơdêk tơdroăng rêh ối ƀă mơnhông krá tơniăn. Tung mâu hơnăm achê pơla kố, kơxô̆ rơpŏng kơtiê dêi pơlê Đăk Kjông xăm hên 38,46% hơnăm 2021 chu ối 5,8% a hơnăm 2023.

Pôa Trần Xuân Nam, Kăn phŏ hnê ngăn Đảng ủy, Kăn hnê ngăn Vi ƀan cheăm Lơ Ku, tơring Kƀang , kong pơlê Gai Lai tối ăm ‘nâi:

“Kăn ƀô̆, đảng viên châ ăm lăm troh a pơlê mê rêm khế ai hnoăng cheăng tối tơbleăng ăm Đảng ủy ‘na tơdroănng, tăng ngăn, veăng kum mâu rơpŏng kơtiê, tơdrêng ƀă kăn kăn hnê ngăn chi ƀô̆ a pơlê tung tơdroăng hnê mơhnhôk, gum kuăn pơlê hluăn kơtiê krá tơniăn; pêi tơdroăng mơhnhôk pơhlêh tuăn tơmiât, túa pêi cheăng tung kơpong hdroâng kuăn ngo. Mơhé xăm kơtiê dêi cheăm hâi tiah tơdroăng púi vâ la tiô mâ hlo hiăng tơƀrê  iâ ƀă hiăng pêi tro pơkâ xăm kơtiê tung cheăm’’.

Tơdrêng ƀă hnê mơhno nhên khât hlối rơtế bă Đảng ủy mâu kăn pơlê cheăm, kuăn pơlê mơngế Bơhnéa a pơlê Đăk Kjông, cheăm Lơ Ku, tơring Kƀang kong pơlê Gia Lai hiăng tơniăn tung rêh ối, rĕng kơdroh kơklêa xăm kơtiê vâ mơjiâng thôn pơlê nếo lĕm, rơkê plĕng. Tơdroăng pêi pro mê ăm hlo ki tơrŭm môi tuăn dêi mơngế Bơhnéa ƀă hnoăng pêi pro ki kal dêi Đảng tung tơdroăng rơtế ƀă mơnhông rêh ối dêi kuăn pơlê kơpong kuăn ngo.