Klâ hngế ing hngêi ối dêi rơpŏng, kơpong pro tíu ki păn chu prăng dêi rơpŏng ngoh nâ A Tuấn prếi Y Chéc, hdroâng Jêh - Triêng, thôn Dục Nhầy 3, cheăm tơkăng kong Đăk Dục, tơring Ngọc Hồi châ pro lĕm tơniăn. Rơtế ƀă kơpong kơdroăng păn pro troăng prôk a dế tơ’lêi tơniăn ăm tơdroăng ki răk ngăn lối chât to chu kriếo ƀă chu kăn, rơpŏng ối hnhâng hlâm pro môi kơpong ki rơdâ lối 100 met karê vâ chu prôk lăm. Ngoh A Tuấn ăm ‘nâi, ing tŏng gum, hnê mơhno dêi kăn ƀô̆ Khu ngăn vâi kơdrâi cheăm Đăk Dục ƀă kăn ƀô̆ Đông mố đô̆i gâk tơkăng kong Dục Nông, rơpŏng hiăng mơnhông tơdroăng ki păn hlối ai xếo tơdroăng ki păn chu kơ’nêi hmâng vâ:

“Peăng khu ngăn vâi kơdrâi ai gum 6 rơtuh liăn, on veăng má roê châ péa to chu prăng. Troh nôkố chu hiăng kuăn châ 6 xôh mê tá 6 xôh mê nôkố hiăng châ hên môi tiah kố. On veăng má tơpui tơno vâ pro kơdroăng akố. Păn chu pro pơxúa liăn ngân tơniăn ăm rơpŏng hrê rêm hâi”.

Pêi pro Rôh mơhnhôk “Pro pơhlêh túa tơmiât, túa pêi dêi hdroâng kuăn ngo, pro ăm hdroâng kuăn ngo ai ivá mơ-eăm vâ hluăn ing kơtiê”, 3 hơnăm hdrối nah tơring Kon Plông tơkŭm mơjiâng túa pro kơdroh kơtiê tro ƀă rak vế túa lĕm tro vâ pro ôm hyô. Tơdrêng amê hlối mơdêk rơdêi tơdroăng ki hnê tối, mơhnhôk  kuăn pơlê Rơteăng, Hrê pêi dêi lối 155 ha kơdrum pơhlêh chiâng pêt hdrê loăng plâi kâ, kơchâi, reăng tíu hngíu. Pôa Châu Văn Lâm, kăn phŏ pơkuâ ngăn Đảng pơlê kân Mang Deang, tơring Kon Plông ăm ‘nâi, vâ pơhlêh túa tơmiât, túa pêi dêi vâi krâ nhŏng o ai hnoăng cheăng kal khât dêi mâu đảng viên tung Chi ƀô̆ a thôn pơlê.

“Chi bô̆ mâu thôn hnê tối, mơhnhôk kuăn pơlê pêi dêi kơdrum deăng pêt loăng plâi kâ, pêt kơchâi, plâi pôm tíu hngíu vâ pơhlêh tơdroăng rêh ối rêm hâi xuân môi tiah mơdêk pêi lo liăn dêi kuăn pơlê. Chi ƀô̆ xoăng rêm ngế đảng viên pơkuâ rơpŏng, khu. Ngin xo đảng viên cho ki xiâm, đảng viên pơkuâ khu rơpŏng pêi hdrối, mê rơpŏng, khu rơpŏng pêi tiô”.

Tơring Tu Mrông, kong pơlê Kon Tum ai lối 95% pơ’leăng mâ mơngế cho hdroâng Rơteăng. Vâ pơhlêh túa tơmiât, túa pêi dêi vâi krâ nhŏng o tung pêi chiâk deăng, khu kăn pơkuâ ƀă mâu khu râ dêi tơring pêi pro túa pơkâ “ối a chê ƀă kuăn pơlê” ƀă “râng kŏng hnê tơdroăng cheăng “. Pôa Ka Ba Thành, kăn pơkuâ ngăn Đảng tơring, ăm ‘nâi: ƀlêi chiâng kân khât dêi tơring cho hiăng pơhlêh hiâm mơno tơmiât pêi bu kal bê kâ tê, xâu mung liăn hngêi rak liăn dêi vâi krâ nhŏng o, malối cho ƀă mâu rơpŏng kơtiê:

“Kuăn pơlê hiăng khên tơnôu mơnhông cheăng kâ. Kơxô̆ liăn chĕn ing hơnăm 2021 troh hơnăm 2023 cho lối 280 rơtal liăn. Dâng môi hơnăm ai 80 rơtal liăn tung kơxô̆ liăn mung cho rơpŏng kơtiê, rơpŏng vâ chê kơtiê ƀă rơpŏng châ tơnêi têa gum. Ing mê hlo tiah kố hiăng châ pơhlêh túa tơmiât, túa pêi dêi vâi krâ nhŏng o ing tơdroăng hbrâ rơnáu, tơkôm khên tơnôu, hbrâ mung liăn vâ po rơdâ cheăng kâ tung mê ai pêt pôm pơkeăng, pêt pơkeăng, păn mơnăn”.

Klêi kơ’nâi 3 hơnăm tơbleăng pêi pro Rôh mơhnhôk “Pro pơhlêh túa tơmiât, túa pêi dêi hdroâng kuăn ngo, pro ăm hdroâng kuăn ngo mơheăm hluăn ing kơtiê krá ton”, mâu khu râ, pơkuâ cheăng dêi kong pơlê Kon Tum hiăng pro, mơjiâng 866 túa tŏng gum dêi rơpó pêi cheăng kâ, pêi kơdrum tơ’mot vâ chê 10.600 rơpŏng kơtiê, rơpŏng vâ chê kơtiê veăng. Mâu túa pêi kố hiăng mơhnhôk châ lối 96 rơtal liăn tŏng gum hdrê pêt, liăn cheăng, kih thuât hnê gum lối 5.500 rơpŏng kơtiê hdroâng kuăn ngo mơ-eăm hluăn ing kơtiê krá ton.

Rơtế a mê, kơxô̆ rơpŏng hdroâng kuăn ngo hiăng rế lôi mâu khôi túa tơlá ki ôh tá tro, ‘nâi xúa khoa hok kih thuât tung pêt tơmeăm khoăng; kơxô̆ rơpŏng veăng tung mâu khu pêi cheăng tơrŭm, tôh pêi cheăng tơrŭm pơrá châ ƀă tơkâ luâ pơkâ mơ’no. Pôa Dương Văn Trang, Kăn pơkuâ hnê ngăn Đảng, Kăn hnê ngăn Hô̆i đong kong pơlê Kon Tum, ăm ‘nâi, môi tung mâu tơdroăng ki kal mê rôh mơhnhôk kố dế tơmiât troh pro pơhlêh túa tơmiât, túa pêi dêi lối 9.700 rơpŏng kuăn pơlê hdroâng kuăn ngo ki u ối vâ mơ-eăm hluăn ing kơtiê.

“Tơdroăng ki pro pơhlêh túa tơmiât túa pêi gá ai túa pêi la tung mê tơkŭm ăm tơdroăng ki pêt mơjiâng kế tơmeăm. Pêt mơjiâng rơkê plĕng kơxô̆ liăn châ xo hên, mê kô hluăn ing kơtiê. Cheăm po rơdâ, tơring po rơdâ, kong pơlê po rơdâ túa ƀă mơ’nui pêi tơƀrê ‘na rôh mơhnhôk cho hiăng pro pơhlêh túa tơmiât túa pêi ƀă hiăng châ klêi kơ’nâi pơhlêh túa pêi dêi kuăn pơlê hdroâng kuăn ngo vâ vâi krâ nhŏng o pin mơ-eăm hluăn ing kơtiê ƀă krá tơniăn khât”.

Rơtế ƀă mâu troăng hơlâ tŏng gum kơjo ‘no liăn, tŏng gum dêi Đảng, Tơnêi têa, Rôh mơhnhôk “Pro pơhlêh túa tơmiât, túa pêi dêi kuăn pơlê hdroâng kuăn ngo, pro ăm kuăn pơlê hdroâng kuăn ngo mơ-eăm hluăn ing kơtiê krá tơniăn” xua kong pơlê Kon Tum tơbleăng pêi pro dế veăng gum pơhlêh tơƀrê tung pêi cheăng ƀă tung tơdroăng rêh ối dêi vâi krâ nhŏng o hdroâng kuăn ngo tung kong pơlê. Vâ rôh mơhnhôk kố pơtối châ mot trâu hơngế, tơƀrê khât kong pơlê Kon Tum krâ rôh mơhnhôk ƀă tơdroăng pêi pro mâu tơdroăng, troăng pơkâ, tơdroăng pơkâ dêi khu pơkuâ ngăn Đảng, Vi ƀan hnê ngăn kong pơlê malối cho mâu tơdroăng ki xiâm tơdjâk troh hnoăng cheăng kơdroh kơtiê ƀă Tơdroăng pơkâ tơnêi têa mơjiâng thôn pơlê nếo a kơpong hdroâng kuăn ngo.