Gia Bắc cho cheăm kơpong hngế hngo dêi tơring Di Linh, kong pơlê Lâm Đồng, 95% pơ’leăng mâ mơngế kuăn ngo K’Ho. Tơdrêng ƀă  tơmâng ‘no liăn pêi cheăng dêi Đảng ƀă tơnêi têa tung tŭm tơdroăng, tơdrêng ƀă tơdroăng mơnhông ing rêm ngế kuăn pơlê tung mâu pơlê cho tơdroăng kal khât vâ mơnhông cheăng kâ tung pơlê, ing hâi châ mot Đảng, ngoh K’Bơn, kăn ƀô̆ hơnăm ối nếo cheăm Gia Bắc, tơring Di Linh, kong pơlê Lâm Đồng hiăng mơ-eăm tâi ivá tơná tung tơdroăng hnê, mơhnhôk kuăn pơlê pêi mâu troăng hơlâ xua kong pơlê mơhnhôk. K’Bơn ăm ‘nâi vâ kuăn pơlê hlê ƀă pêi ƀối rêm ngế Kăn ƀô̆ đảng viên cho mơngế ki djâ troăng ahdrối tung pêi tŭm tơdroăng cheăng.  

‘’Drêng hiăng chiâng mơngế đảng viên, á ai rôh vâ hlê nhên mâu troăng hơlâ  dêi Đảng, luât tơnêi têa. Kơnôm ing mê, á nếo pêi tro tơdroăng cheăng châ Đảng ủy, mâu kăn pơcháu. Ing mê, kum kuăn pơlê hên tâ tung mơnhông cheăng kâ rêh ối, mơjiâng thôn pơlê nếo châ tơƀrê’’.

Ing tơdroăng tơmâng khât tung mơjiâng Đảng khu cheăng kal kí rơdêi, troh nôkố Đảng ƀô̆ cheăm Gia Bắc hiăng châ tơ‘mot 98 ngế đảng viên, ki hên cho đảng viên kuăn ngo, tơkŭm hôp a 9 chi ƀô̆. Tiô pôa K’Thanh, Kăn hnê ngăn chi ƀô̆ ƀuôn K’Sá, cheăm Gia Bắc, tơring Di Linh, đảng viên cho ngế djâ troăng a hdrối tung tơdroăng pêi pro mâu troăng hơlâ pơkâ dêi Đảng ƀă Luât Tơnêi têa. Xua mê, pakĭng ôh tá pơtê hriâm, pơtâp, hnê tơ’nôm mâu tơdroăng hlê plĕng ai pơxúa tung tơdroăng tơbleăng hnê tối ăm kuăn pơlê a mâu pơlê, mâu đảng viên tung chi ƀô̆ xuân kơhnâ veăng mơhnhôk kuăn pơlê pơ’lêh hdrê pêi, kơhnâ pêi chiâk deăng, kum dêi rơpó pơ’lêh hdrê pêt, pêi pơdjuôm, pơhlêh dêi rơpó pêi cheăng, kum dêi rơpó hdrê pêt, hdrê păn, pleăng tơnêi pro troăng prôk, mơjiâng thôn pơlê nếo…

Kơnôm ing mê, tơdroăng rêh ối dêi kuăn pơlê tung pơlê Ka Să tối tơdjuôm, cheăm Gia Bắc tối krê hiăng rĕng kơdroh kơklêa săm kơtiê, mơnhông chiâng cheăm châ mơnhên thôn pơlê nếo. Pôa K’Thanh, kăn hnê ngăn chi ƀô̆ buôn Ka Să, tối:

‘’Pêi pro tiô tơdroăng Tơkêa bro kơxô̆ 04 dêi khu kăn Đảng tơring, dêi Tíu xiâm ‘na ‘’Mơjiâng thôn pơlê nếo’’, kuăn pơlê tung pơlê vâ môi tuăn pêi pro, pleăng tơnêi vâ po rơdâ troăng prôk. Ƀă hnoăng cheăng kăn hnê ngăn chi ƀô̆ pơlê, tơná á đi đo hnê, mơhnhôk kuăn pơlê, nhŏng o xiâm, rơpŏng hngêi, kuăn pơlê tung pơlê thế kơhnâ pêi chiâk, mơnhông tơdroăng rêh ối, pro pơhlêh ngiâ méa thôn pơlê’’.

Ôh tá xê to kăn ƀô̆ đảng viên a mâu pơlê, mâu đảng viên cho kăn hnê ngăn Vi ƀan mâu cheăm, pơlê kân dêi tơring  Di Linh xuân pơtối rak vế pêi tro hnoăng cheăng djâ troăng ahdrối tung tơdroăng cheăng hlối pêi nhên khât ƀă ai pơxúa. Ƀă đảng viên K’Lý, kăn phŏ hnê ngăn Vi ƀan kuăn pơlê cheăm Tân Thượng, tơring Di Linh, ôh tá xê to pêi tro mâu tơdroăng cheăng ki châ pơcháu, ngoh xuân khên tơnôu tăng troăng mơnhông cheăng kâ tiô túa nếo cho pêt măng tây. K’ly ăm ‘nâi, vâ pơhlêh tuăn tơmiât pêi cheăng kâ dêi kuăn pơlê mê kal thế mơnhông ƀă tơdroăng cheăng pêi ai pơxúa khât:

‘’Vâ tơdroăng cheăng kâ dêi kuăn pơlê mơnhông tơniăn, krá, pakĭng pêt mâu loăng kơphế, cheăm ối mơhnhôk kuăn pơlê pêt tơvât mâu loăng plâi ki ê, pơhlêh hdrê loăng hiăng krâ pêt loăng plâi kâ ki tê lo liăn hên mê cho plâi sầu riêng, mắc ca… Tơná á hiăng djâ troăng ahdrối tung pêt măng tây vâ kuăn pơlê hriâm ƀă pêi ƀối. Nôkố măng tây vâi rôe tơniăn, yă tê 70.000 liăn troh 100.000liăn/kg, hên mơngế lăm tăng rôe a kơdrum la ôh tá ai vâ tê’’.

Nôkố lâp tung tơring Di Linh, kong pơlê Lâm Đông ai lối  4.400 ngế đảng viên, tung mê ai vâ chê 900 ngế đảng viên cho kuăn ngo. Mâu đảng viên mê cho mâu ngế dâ troăng ahdrối tung tŭm tơdoăng cheăng, veăng pơhlêh tuăn tơmiêt túa pêi cheăng tung kuăn pơlê hdroâng kuăn ngo, veăng ‘no hnoăng pro pơ’lêh tuăn tơmiât, túa pêi cheăng tung kuăn pơlê hdroâng kuăn ngo, veăng ‘no hnoăng pêi kơhnâ a tơdroăng mơnhông cheăng kâ, rêh ối a pơlê xiâm kong ngo tơring Di Linh.