Troh pôu, rơkâu Têt a Ƀơrô cheăng Kăn sat Cơ đô̆ng – Kŏng an kong pơlê Kon Tum, pôa Trần Quang Phương, Phŏ kăn xiâm hnê ngăn Kuô̆k hô̆i kơ-êng kăn ƀô̆ lêng tíu pêi cheăng hbrâ tơdah Têt, malối cho hiâm mơno hbrâ rơnáu tơplâ rak vế tơniăn tung pơlê pơla tung pơla hdrối, tung ƀă klêi kơ’nâi Têt Lo hơnăm nếo Ất Tỵ 2025.

Teăng mâ kăn pơkuâ Đảng, Tơnêi têa, Phŏ Kăn xiâm hnê ngăn Kuô̆k hô̆i rơkâu mâu kăn ƀô̆ lêng rơtế ƀă rơpŏng hngêi vâi hơnăm nếo ivá mo sêi, hơniâp ro, tơdroăng cheăng rơkê pêi klêi mâu tơdroăng ki Đảng, Tơnêi têa ƀă Kuăn pơlê pơcháu.

Hdrối mê, pôa Trần Quang Phương, Phŏ Kăn xiâm hnê ngăn Kuô̆k hô̆i rơtế ƀă Khu kăn ki pêi dêi hnoăng cheăng Tơnêi têa hiăng troh pôu, rơkâu Têt Lo hơnăm nếo Ất Tỵ 2025 Nôu Việt Nam khên tơnôu Đặng Thị Thu, a bêng Duy Tân, pơlê kong kơdrâm Kon Tum. Rơtế tung hâi lơ 14/1, pôa Trần Quang Phương, Phŏ Kăn xiâm hnê ngăn Kuô̆k hô̆i rơtế ƀă khu kăn ki pêi dêi hnoăng cheăng tơnêi têa troh pôu, rơkâu Têt khu kăn pơkuâ, kuăn pơlê cheăm Sa Loong ƀă kăn ƀô̆, lêng a mâu tíu pêi cheăng lêng a tơring tơkăng kong Ngọc Hồi, kong pơlê Kon Tum.

A pơlê kong kơdrâm Kon Tum, pôu, rơkâu têt Khu pơkuâ ngăn Đảng, Vi ƀan hnê ngăn kong pơlê, Khu pơkuâ ngăn lêng kong pơlê, Khu pơkuâ Mố đô̆i gâk tơkăng kong kong pơlê ƀă Kŏng an kong pơlê Kon Tum.