Pôa Phạm Minh Chính, Ngế pro xiâm hnê ngăn tơnêi têa mơnhên, tối khât tơdroăng ki tơrŭm cheăng, tŏng gum dêi kong têa Rusi ăm Việt Nam tung tơdroăng ki hnê mâu khu ki hriăn ‘na khoa hok, khu ki rơkê tung kơvâ cheăng on tơhrik kơtâu ƀă trếo tik nik; kơchuâ chêh, xúa Tíu ki pro trếo tik nik Đà Lạt; mơjiâng pro Tíu xiâm ngăn ‘na hyôh rơngiâp Việt Nam – Rusi; tŏng gum pơkeăng trếo phóng xạ ăm tơdroăng ki tối, pơlât ŭm tung châ.

Ngế pro xiâm hnê ngăn tơnêi têa púi vâ Kong têa Rusi ƀă Grup pơkuâ Rosatom pơtối tơrŭm, tŏng gum Việt Nam, ôh ti xê mơjiâng pro on tơhrik trếo tik nik mê ối mơjiâng kơvâ khoa hok kong ngê̆ trếo tik nik xua ki xiâm cho vâ pro hơniâp lĕm, mơnhông cheăng kâ rêh ối pơlê pơla. Pôa Alexey Likhachev, Kăn xiâm pơkuâ ăm ‘nâi, Rosatom hbrâ rơnáu tơrŭm, gum Việt Nam mơjiâng pro hngêi kơmăi on tơhrik kơtâu ƀă trếo tik nik; mơjiâng pro tíu xiâm trếo tik nik nếo, rơkê; hnê ‘na kong ngê̆; pro pơhlêh tơmeăm tung tơnêi têa ‘na mâu kế tơmeăm trếo tik nik ăm Việt Nam.