Leh kôh hlá cơ a chuăn Hòn Khoai, tơring Ngọc Hiển, kong pơlê Cà Mau, ối kơtăn ing tơnêi ‘lâng dâng 14 km. Tiú kố cho tíu ki apoăng prôk ing Biển Đông mot troh a kơpong têa kơxĭ Pêa Mâ hâi Luô pa Hdroh, châ pơtih môi tiah pơgôt ki gak ngăn hbo plêng, kơpong têa kơxĭ ƀă tơnêi ‘lâng Pêa Mâ hâi luô pa Hdroh dêi Tơnêi têa. Châ ngăn hlá cơ ki hâk tơngăm dế kơneăng a hbo plêng a’ngêi têa kơxĭ, hơdruê chuât hên ngế ôh tá chiâng kơtôa dêi tơdroăng ki hơniâp ro drêng roh apoăng châ koh hlá cơ a chuăn ki hơngế:

“Drêng tâng ối ƀă mâu lêng a chuăn, veăng tung môi roh koh hlá cơ á tâ mê cho tơdroăng ki hơniâp ro má môi ƀă á”.

 Ai lối 150 to chuăn kân kŭn, ối tung hên hĕng kơpong têa kơxĭ Pêa Mâ hâi luô  pa Hdroh, tíu ki ai kuăn pơlê rêh ối, tíu ki bu ai to mô đô̆i. Ai mâu tíu ki ‘nâ tơnêi tíu, kong ngo hmốu ki mơdâng ngi ‘ngêi, ngo hmốu kơroh kơrâm, prôk lăm pá puât. Laga, tơkâ luâ tâi tâng, mâu lêng ing khu ki gak ngăn kơmăi radar, mô đô̆i gak tíu tơkăng kong ƀă hên mâu khu lêng ki ê pơrá râng krá pháu hơnêa, plâ hâi plâ măng pơrá gak ngăn krá kâk tâi tâng a hbo plêng, kơpong têa kơxĭ, séa mơnhên ngăn rêm tơdroăng cheăng mâu plong tuk ƀă mâu tíu ki kal a tơnêi vâ tối tơbleăng troh a khu ki pơkuâ ngăn; kố ối cho tíu ki loi tơngah krá kâk ăm mâu kuăn pơlê ki tơnăng ká xixŏng drêng ôh tá mơhúa tro châi tamo lơ trâm tơdroăng xía vâ a plong tuk drêng lăm tơnăng ká xixŏng. Đăi ŭi Nguyễn Tuấn Anh, Kăn pơkuâ ngăn kơmăi radar 625 trung đoân 551 Khu xiâm ngăn lêng Kơpong 5 lêng tuk tối tiah kố:

“Kơmăi radar hiăng pơkâ pêi pro mâu hnoăng cheăng hbrâ vâ tơplâ séa mơnhên ngăn, rĕng teăm châ hlo vâ tối pơtâng ki xiâm tung kơpong ki gak ngăn dêi  hnoăng cheăng krá tơniăn ƀă tơdroăng ki gak ngăn, ki rơhêng vâ tối, cho hbrâ rơnáu tơplâ teăm tơdrêng vâ tối pơtâng mâu tơdroăng tung kơpong têa kơxĭ, a hbo plêng, a’nâi pơtroh ăm Khu kăn pơkuâ ngăn mâu kăn pơkuâ ngăn rêm râ veăng pơkuâ ngăn, kring vế, rak ngăn tơniăn, krá kâk kơpong têa kơxĭ ki hiăng châ xing xoăng hnoăng gak ngăn”. 

Kơnôm châ ai tơdroăng tŏng gum dêi Đảng, Tơnêi têa, tơdroăng ki tơdjuôm ivá mơno dêi kuăn pơlê, mâu chuăn Pêa Mâ hâi luô pa Hdroh chôu phut kố dế pơhlêh rêm hâi, tơdroăng ki mơjiâng troăng prôk tung chuăn, hngêi pơkeăng, tíu hdoăng têa ôu hum, on lơtrik, hngêi trung mâm non ta troh a hngêi trung râ má péa châ mơjiâng adrêng, gum kuăn pơlê châ tơ’lêi hlâu tâ tung tơdroăng rêh kâ ối ƀă mơnhông pêi cheăng kâ. Kơnôm châ Tơnêi têa ƀă Hngêi rak liăn ăm mung liăn tro tơdroăng, mê nôkố pakĭng cheăng păn ká xixŏng, hên kuăn pơlê bố bô xuân hiăng khên mơ’no liăn ngân vâ rôe ká păn tung hlâm ki kân, hnối mơnhông ‘na tơdroăng mơnhông ôm hyô mê tơdroăng rêh kâ ối dêi kuăn pơlê rế hiá rế chía tơniăn tâ:

“Á hlo tơdroăng ki păn tơnăng ká xixŏng mê ga cho tơ’lêi hlâu. Akố, tâng vâ tối ga cho hlâu vâ mơnhông păn ká xixŏng a têa, a ving, ga ôh tá tro khía mơhot plong mot hên, têa krúa mê mâu ká, xixŏng rĕng xông kân, dâi lĕm. Hơnăm 2024 châ tê ai 10 tâ̆n ká xixŏng châ tơkâ lối hrĭng rơtuh liăn”.

Tơdroăng ki hơniâp ro a rơnó Hơngui tơkéa vâ tối môi tiah rĕng troh hdrối tâ a mâu chuăn, xua ai mâu tơdroăng ki mơđah hơdruê xuăng, tơmeăm Têt ki ai pơxúa khât troh tơrêm kơpong ki khu kăn dế lăm pôu, diâp ăm mâu lêng ƀă kuăn pơlê a chuăn ki kố; ƀă ki rơhêng vâ tối, môi hnoăng cheăng ki ôh ta păng lôi mê cho kơxu kơƀăn tek a chuăn, Kơƀăn tơxông akố xuân ai ‘nhiăn, to drêh, hơ’nêh mâm chu la kơxu ƀă hlá priât, túa ki vâ pro kơƀăn mê mâu lêng hmâ lăm ko xo kông hlá plâi tuâk.

Tơkâ luâ ing tơdroăng ki hơniâp ro kố, rêm ngế tung khu nếo hlê plĕng nhên tâ ‘na tơdroăng rêh kâ ối, pơlê pơla, tơdroăng hriâm tâp, tơdroăng ki pêi cheăng kâ, rêh ối, hnoăng cheăng ƀă tơdroăng ki ro tơdah Têt a rơnó Hơngui, koh tơdah Têt dêi mâu kăn ƀô̆, lêng ƀă kuăn pơlê a kơpong Pêa Mâ hâi Luô Pá Hdroh, hlê plĕng nhên tâ ‘na hnoăng ki veăng gum, tơdroăng ki piu lôi dêi tơná dêi mơngế lêng gak ngăn têa kơxĭ; ‘na hnoăng cheăng ki kal dêi mơngế kuăn pơlê a chuăn drêng ai khía mơhot, rế rak vế ngăn hnoăng cheăng têa kơxĭ, rế mơnhông pêi cheăng kâ tơkuôm ivá cheăng vâ gum ăm mâu chuăn kố chiâng tíu ki ngiât lĕm, kro mơdrŏng kân a kơpong têa kơxĭ dêi Tơnêi têa.