Kot mâ a kơpong pơlê kơtiê Ea Súp, kong pơlê Dak Lak, tơdroăng hriâm tâp ối hên pá puât, ngế droh Hoàng Thị Thu Phương, kuăn ngo Mường hiăng tơkâ hluâ pá puât vâ rak dêi tơdroăng pói vâ dêi tơná. Nôkố cho sinh viên hơnăm má 4 kơvâ Quản trị Nhân lực a Hngêi trung Đăi hok Lao đô̆ng Xah Hô̆i Pơlê kong kân Hồ Chí Minh, Phương ôh tá xê to rơkê tung hriâm tâp, mê ối cho ngế pêi cheăng pơlê pơla a hngêi trung đăi hok ƀă a pơlê xiâm, đi đo veăng mâu tơdroăng pleăng hnoăng cheăng.

‘’Mơngế pêi cheăng ôh tá păng ôh tá tŭm mơngế vâ mơnhông môi tơnêi têa, xua mê á tơmiât ai môi troăng prôk ton xŏn la ngiâ ah. Ƀă á tơmiât á xuân chiâng vâ pơkuâ lơ pơkuâ môi khu pêi cheăng ki lâi ‘lo xua mê á o hriâm pơkuâ pơkuâ mơngế pêi cheăng. Á xuân vâ châ pleăng, châ vêh pơlê xiâm tơná, tâng ai roh tơ’lêi hlâu mê á kô hbrâ vâ pleăng pêi cheăng a tơring’’.

H’Uyên Ƀyă, ngế droh Rơtế a tơring Krông Bông, kong pơlê Dak Lak, nôkố cho sinh viên đăi hok Pơlê kong kân Hồ Chí Minh. Sap ing hơnăm má môi đăi hok, H’Uyên hiăng mơdoh chôu veăng mâu tơdroăng ki pleăng hnoăng cheăng Rơnó pơtê hriâm pêi tơdroăng lĕm, pleăng mơheăm ƀă mâu tơdroăng pêi chôu pakong hriâm a hngêi trung đăi hok. Tơdroăng cheăng ki pêi tơ’nôm ƀă mâu tơdroăng pleăng hnoăng cheăng gum H’Uyên thăm ‘nâi hên ki rơkê, tơdroăng ki loi tơngah, pro xiâm kối krá tơniăn vâ tơná kô châ tơƀrê ƀă tơdroăng cheăng dêi môi ngế cô yăo a pơlê xiâm.

‘’Drêng châ hriâm a Pơlê kong kân Hồ Chí Minh, môi pơlê kong kân mơnhông tơtêk mê á tơmiât á kô chiâng xúa mâu tơdroăng ki rơkê tơná, vêh hnê mâu tơdroăng ki rơkê, mâu troăng pêi rơkê, hnê ăm hok tro ƀă kum mâu vâi o thăm krá tơniăn tung pơlê pơla mot tơrŭm cheăng môi tiah nôkố’’.

Ƀă H’Sian Êban, hdroâng kuăn ngo Rơđế, ối a tơring Krông Pač, pói vâ kum kuăn pơlê hlê plĕng luât ƀă kơdroh ki lŭp drêng ai roh tơdroăng tơdjâk troh luât, sap ing ối kŭn á hiăng tối dêi tơná thế hriâm rơkê vâ chiâng môi ngế pêi ‘na luât rơkê lĕm dêi pơlê. Nôkố dế tiô hriâm hơnăm 3 a Hok viê̆n Tòa án pơlê kong kân Hà Nội, H’Sian ôh tá xê to châ rơkê tung hriâm tâp mê ối cho ngiâ méa ki má môi rak hnoăng ngế tơpui djâ tơdroăng po pêi cheăng, ƀeăn ƀĕng tung mâu tơdroăng cheăng khu pú hên. H’Sian khŏm mơ-eăm kô vêh pơlê xiâm klêi kơ’nâi klêi hriâm.

“Sap ing apoăng tối vâ hriâm mê á tối ƀă nôu pâ cho kuăn kô vêh Dak Lak vâ mơnhông pơlê xiâm. Ai hên tơmeăm pa kong tá, laga rêm ngế kơ-êng cho tơdroăng pêi cho lĕm tro môi tiah mê, mơ-eăm hriâm tâp môi tiah mê, hôm vâ ối a kố vâ pêi cheăng, á tối hêng ôh, á kô vêh a Dak Lak vâ pêi cheăng ăm hdroâng kuăn ngo dêi tơná’’.

Kong pơlê Dak Lak ai rơpâu ngế sinh viên hdroâng kuăn ngo dế tiô hriâm a mâu hngêi trung đăi hok, kao đăng tung lâp tơnêi têa. Tung mê ai hên sinh viên hiăng mơ-eăm tung hriâm tâp, thăm veăng hên mâu tơdroăng xua pơlê pơla tung hngêi trung ƀă pa kong hngêi trung. Kố xuân cho mâu ngế ki eăng tung mâu tơdroăng pêi dêi đoân hô̆i a hngêi trung đăi hok kao đăng xuân môi tiah drêng vêh pơlê veăng tung pơlê pơla, pêi cheăng.

Nâ H’Giang Niê, Kăn pơkuâ Đoân Droh rơtăm kong pơlê Dak Lak, Kăn hnê ngăn Khu sinh viên Việt Nam kong pơlê Dak Lak tối ăm ‘nâi, ƀă tơdroăng pêi cheăng ƀă hnoăng dêi tơná, khu tơrŭm Đoân, khu sinh viên đi đo pro tơ’lêi hlâu vâ mâu sinh viên, ki má lối cho sinh viên hdroâng kuăn ngo veăng tơdroăng đoân, hô̆i. Mâu kâu lăk ƀô̆ “Sinh viên 5 tro’’ a mâu hngêi trung đăi hok châ mơjiâng ƀă tơdroăng xiâm ƀă troăng pêi cheăng hên hĭn mơhnhôk sinh viên veăng pêi.

‘’Ngin pói tơmiât vâ pêi troh cho mâu pú hmâ sinh viên thế ‘nâi plĕng dêi châ chăn tơná, tăng xêh troăng prôk, troăng ki tơná vâ prôk ƀă ngin rơtế mâu pú hmâ tung tơdroăng pơtâp tơdroăng trâm mâ tơpui pơlê pơla. Pakĭng tơdroăng hriâm ki rơkê a hngêi trung, kal ai tơdroăng ki veăng pêi tung pơlê pơla, tung mê ki kal má môi ngin vâ mâu pú hmâ ‘nâi pin thế ai tơdroăng cheăng pêi, hnoăng cheăng tung tơdroăng rak, mơnhông khôi túa lĕm tro dêi rêm hdroâng kuăn ngo tơná ƀă ing mê mâu pú kô pơtâng tối hên vâ troh lâp lu mâu tơdroăng ki tro, lĕm tung pơlê pơla’’.

Vêh ing pơlê, mâu sinh viên hdroâng kuăn ngo a Dak Lak hiăng thăm hriâm tâp, hriâm tơdroăng ki rơkê, pơtâp tơdroăng rêh ối pêi cheăng a mâu hngêi trung đăi hok, kao đăng xuân môi tiah veăng gum hên tơdroăng xua pơlê pơla. Châ achê ƀă tíu hriâm tâp rơxông nếo, mâu sinh viên đi đo mơ-eăm, kơdo tâi ivá ƀă đi đo tơmiât troh pơlê xiâm, hâk vâ pleăng hnoăng cheăng vâ mơjiâng pơlê tơná. Kố xuân cho mâu ngế ki veăng hên kum mơngế pêi cheăng tung mơnhông Dak Lak xuân môi tiah pơlê pơla rêm hdroâng kuăn ngo tung la ngiâ.