Troh nôkố, tơdroăng pêi hiăng klêi đeăng, pơcháu ăm lối 44 rơpâu toăng hngêi vâ mâu rơpŏng châ ối tung toăng hngêi nếo; tơdrêng amê mơjiâng lối 34 rơpâu toăng hngêi. Troh nôkố lâp tơnêi têa u ối dâng 240 rơpâu toăng hngêi pơtân, hngêi xi kơchoh kal thế tơkŭm mơjiâng, rơnêu vâ pêi kêi đeăng sap ing kố troh mơ’nui hơnăm 2025.

Teăng mâ Khu hnê mơhno, pôa Phạm Minh Chính, Ngế pro xiâm hnê ngăn tơnêi têa mơnhên, kheăn kơdeăn Khu xiâm pơkuâ cheăng pêi Mô đô̆i rong râ ƀă Rêh ối pơlê pơla, Khu xiâm pơkuâ lêng, Khu xiâm pơkuâ Kŏng an, mâu khu xiâm, kơ koan, kong pơlê hiăng hbrâ, thăm veăng pêi pro châ tơƀrê mâu hnoăng cheăng, troăng pêi hiăng pơkâ mơ’no, kum tung mâu tơdroăng châ tơƀrê apoăng cho hôm păng ‘nâng dêi Tơdroăng pêi pro.

Pôa Phạm Minh Chính, Ngế pro xiâm hnê ngăn tơnêi têa tối nhên, tơdroăng kêi đeăng xut tah hngêi pơtân, hngêi xi kơchoh cho môi hnoăng cheăng kal kí ki kal hiăng mơhno nhên tung mâu Mơgêi, Pơkâ, hnê mơhno dêi Khu xiâm Đảng, Khu xiâm kal kí, Khu pơkuâ hnê ngăn cheăng Đảng, Kuô̆k hô̆i, Chin phuh, Ngế pro xiâm hnê ngăn Chin phuh, tơmiât troh leh tơbâ mâu hâi leh kân tung hơnăm 2025 ƀă tơ’noăng koh phiu ro Hneăng hôp Đảng ƀô̆ mâu râ, la ngiâ Hneăng hôp Đảng lâp tơnêi têa roh má XIV.