A rôh tơdah, pôa Tô Lâm, Kăn xiâm pơkuâ hnê cheăng Đảng tối, Việt Nam đi đo nhoăm ƀă pêi ahdrối tơdroăng ‘mâi mơnhông ƀă mơdêk tơrŭm cheăng, tơrŭm môi tuăn pơla Việt Nam - Lếo, ngăn mê cho tơdroăng cheăng ki kal, ai pơxúa ƀă mơnhông mơdêk dêi tơrêm tơnêi têa; tối nhên Việt Nam hdrối kơ’nâi môi tiah xo, đi đo môi tuăn ƀă Lếo mơnhông cheăng kâ, hnê tối ăm dêi rơpó ‘nâi mâu tơdroăng cheăng ƀă Lếo tung tâi tâng mâu tơdroăng cheăng, péa tơnêi têa Việt Nam - Lếo kô ‘nâi tơrŭm krá rơtế ƀă dêi rơpó mơnhông cheăng kâ.

Kăn pơkuâ hnê ngăn cheăng Đảng pơkâ thế tung la ngiâ Khu xiâm Kŏng an péa tơnêi têa kal pơtối rak vế pêi pro tơdroăng ki lĕm ton nah, mơdêk veăng gum dêi rơpó, tơrŭm krá, mơdêk tơpui tơno tối ăm dêi rơpó ‘nâi mâu tơdroăng, túa pêi cheăng, ‘nâi tơdroăng, tơrŭm tơplâ ai pơxúa ƀă hên tơdroăng cheăng plâ ‘nhiê dêi khu kơneăm; tơrŭm krá hbrâ, mơdât  khu ki pro tơ’nhiê tơdroăng hơniâp lĕm, ki hriăn pro tơ’nhiê tơnêi têa, mơdât mâu ki ai xôi tơkâ luâ tơnêi têa.