Pôa Trần Thanh Mẫn, Kăn xiâm hnê ngăn Kuô̆k hô̆i tối nhên: kố cho rôh hôp apoăng tung hơnăm 2025, po tung tơdroăng hơniâp ro lâp tơnêi têa hâk mơnê Đảng, hâk rơnó Hơngui ƀă tơkŭm po mâu tơdroăng cheăng hâk phiu Têt Nguyên đán Ất Tỵ, tơbâ 95 hơnăm Hâi mơjiâng Đảng Kŏng san Việt Nam. Tơdrêng amê, Kuô̆k hô̆i ƀă Hô̆i đong hnê ngăn rêm râ po mâu tơdroăng cheăng tơbâ 9 hơnăm Hâi pôk kăn xiâm pơkuâ Kuô̆k hô̆i Việt Nam. Tối nhên tơdroăng cheăng tung hơnăm 2025 gá hên, Kăn xiâm hnê ngăn Kuô̆k hô̆i tối nhên, tung hneăng má I kố tơkŭm tơkŭm po Hneăng hôp ôh tá tối hdrối rôh má 9:

"Pin tơkŭm, mơdoh ivá ăm Hneăng hôp ôh tá tối hdrối a mơ’nui khế 2. Hneăng hôp kố Kuô̆k hô̆i kô hôp ôh tá riân hâi chôu mê riân pro tiah lâi kô ƀlêi chiâng vâ tơbleăng pơhlêh mâu luât, tơdroăng pơkâ dêi Kuô̆k hô̆i ăm tơdroăng ki Mơgêi Pơkâ 18 ‘na rơkê plĕng, tơƀrê kơ koan cheăng tơnêi têa, pêi cheăng xêt tơƀrê tung la ngiâ”.

Vi ƀan pơkuâ cheăng Kuô̆k hô̆i hiăng séa ngăn tối tơbleăng tơdroăng cheăng tiô tuăn kuăn pơlê vâ dêi Kuô̆k hô̆i khế 12/2024. Pôa Dương Thanh Bình, ngế xiâm pơkuâ Khu hnê mơhnhôk ăm ‘nâi: Kuăn pơlê môi tuăn khât pơtối hnê mơhno pêi pro Pơkâ kơxô̆ 18 ‘na xing xoăng rơkê kơ koan cheăng tung khu pơkuâ tơdroăng kal kí. Kuăn pơlê púi vâ rĕng ai môi khu tơrŭm pơkuâ mâu kơ koan Đảng, Tơnêi têa, mâu khu tơrŭm, rêm râ sap ing Tơnêi têa troh kong pơlê tơkŭm, iâ rơkê, tơdroăng cheăng xêt, tơƀrê.

Vi ƀan pơkuâ cheăng Kuô̆k hô̆i hiăng ăm rơkong veăng tơpui ‘na kơxop hlá mơ-éa Pơkâ tơrŭm pơkâ nhên tơdroăng tơkŭm po trâm mâ kuăn pơlê dêi mâu kăn Kuô̆k hô̆i ƀă kăn Hô̆i đong hnê ngăn kuăn pơlê. Hên ngế cheăng tung Vi ƀan pơkuâ cheăng Kuô̆k hô̆i tá hâi hlê nhên ‘na Khu ki ai mâ đi đo Vi ƀan xiâm Măt trâ̆n Tơnêi têa Việt Nam râ cheăm tơkŭm po Rôh hôp trâm mâ kuăn pơlê. Pôa Hoàng Thanh Tùng, Kăn pơkuâ Vi ƀan Luât tối ki ai khât:

"Khu ki ai mâ đi đo Vi ƀan xiâm Măt trâ̆n Tơnêi têa Việt Nam râ cheăm ôh ti xê tíu ki lâi xuân pêi cheăng tơƀrê ƀă tơ’mô môi tiah dêi rơpó, malối cho mâu tơring cheăm kơpong hngế hngo, kơpong trâm hên xơpá. Mê pơkâ xiâm tơkŭm po Rôh hôp trâm kuăn pơlê a pơlê râ cheăm la pơcháu khât tung tơdroăng pơkâ ăm Khu pơkuâ Vi ƀan Măt trâ̆n Tơnêi têa Việt Nam râ cheăm đi đo cho kơ koan pơkuâ, tơrŭm ƀă Măt trâ̆n Tơnêi têa râ tơring ƀă mâu kơ koan, tơkŭm trâm mâ kuăn pơlê mê kô ai mâu ngế ki ‘nâ ôh tá rak tơniăn tơdroăng pơkâ thế, tơdjâk troh ki rơkê plĕng rôh trâm mâ kuăn pơlê”.

A rôh hôp, tâi tâng mâu ngế cheăng tung Vi ƀan pơkuâ Kuô̆k hô̆i hiăng tơbleăng Pơkâ tơrŭm pơkâ nhên tơkŭm po trâm mâ kuăn pơlê dêi mâu kăn Kuô̆k hô̆i ƀă kăn Hô̆i đong hnê ngăn kuăn pơlê. Pơkâ ‘na hnoăng ƀă cheăng pôu râng dêi mâu kơ koan, khu tơrŭm, tung tơdroăng trâm mâ kuăn pơlê; Tơdroăng cheăng túa pơkâ, tơdroăng kal trâm kuăn pơlê; Tơkŭm mâu rơkong tơpui, pâ thế dêi kuăn pơlê; malối cho pơkâ cheăng pôu râng dêi kơ koan, khu tơrŭm, tíu pêi cheăng tŏng gum kuăn pơlê, tơbleăng tơdrăng tơdroăng ki tŏng gum pâ thế dêi kuăn pơlê ƀă séa ngăn tơdroăng tŏng gum pâ thế dêi kuăn pơlê.

Mâu ngế cheăng tung Vi ƀan pơkuâ Kuô̆k hô̆i xuân tối mâu tơdroăng ôh tá tơniăn kal châ mâu kơ koan ki ai tơdjâk troh ai troăng hơlâ tơƀrê tung la ngiâ môi tiah kế tơmeăm to kơnâ yă; tơdroăng ki hâ ho a troăng prôk; tơdroăng ki tê mơdró, pơto chơ, xúa mlŏi ôh tá tro luât ƀă hên ki ê. Kăn xiâm phŏ hnê ngăn Kuô̆k hô̆i Nguyễn Đức Hải pơkâ thế rĕng ăm Luât Tơnêi 2024 châ xúa tung tơdroăng rêh ối:

"Pin dế tơbleăng pêi pro Luât tơnêi pơxiâm ăm xúa tung rêh ối kuăn pơlê phiu ro khât. La tơdroăng ki tơdjâk troh ‘mâi rơnêu yă tơnêi; tơdjâk troh mơnhên hnoăng rak xúa tơnêi mâu kong pơlê ƀă hên ki ê nôkố ối ai hên hồ sơ. Pin mơdêk hnoăng cheăng hbru ăm mơ-éa hnoăng rak xúa tơnêi, tơdroăng kố pâ thế tơkuưm tơrŭm dêi rêm râ. Tung tơdroăng môi luât ki nếo, troăng hơlâ pơkâ nếo xúa ƀă mâu kuăn pơlê dế tơkôm”.

Vi ƀan pơkuâ Kuô̆k hô̆i pơkâ thế Chin phuh hnê mơhno mâu khu xiâm, kơvâ cheăng ki ai tơdjâk, khu kăn pơkuâ mâu kong pơlê tơmâng ngăn troh tơdroăng cheăng hbrâ kế tơmeăm vâ tê tung rôh Têt Lo hơnăm nếo; Khu xiâm ngăn troăng prôk ƀă rơxế kơtâu thăm mơdêk mâu troăng hơlâ séa ngăn tơdroăng ki pêi pro chêh tơdrăng yă cước, pơkâ yă chơ. Khu xiâm ngăn Kŏng an séa ngăn kơtăng, kơdroh iâ tơdroăng ki ôh tá tơniăn tơklâm rơxế a drô troăng, malối cho tung pơla mâu tơdroăng cheăng pơto chơ tơmối, chơ tơmeăm kô tâk rế hên vâ teăm tê tung rôh Têt Lo hơnăm nếo.