Tơdroăng ‘’Hơngưi Gâk kring tơkăng kong – Hơtô hiêm mơno kuăn pơlê tung Pơlê’’ hơngui Ất Tỵ 2025 nếo châ Khu xiâm pơkuâ Mô đô̆i gâk tơkăng kong kong pơlê Gia Lai tơkŭm po a cheăm Ia Pnôn, tơring Đức Cơ, ƀă hên tơdroăng ki kơnâ trối: ‘’Roh kơchơ Têt 0 liăn’’, tơdroăng kơxuô kơƀăn chưng ngiêt ƀă trâm mâ mơhno khôi túa lĕm rơhdruê xoâng phiu ro tơnêi têa pơhlêh nếo, phiu ro Đảng, phiu ro Hơngưi Ất Tỵ 2025. A kố, Khu xiâm pơkuâ Mô đô̆i gâk tơkăng kong kong pơlê Gia Lai hiăng diâp 100 kơxuô tơmeăm ăm mâu rơpŏng ai hnoăng tơnêi têa ƀă rơpŏng ai tơdroăng rêh ối pá puât.

Tơdrêng amê, 20 ngế o hok tro tung tơdroăng ‘’Kum o troh hngêi trung’’ ƀă kuăn roăng dêi mâu đông mô đô̆i gâk tơkăng kong hiăng châ tơdah kơxuô tơmeăm Têt’’. Châ diâp kơxuô tơmeăm, ngoh Siu Kỳ, ối a pơlê Bua, cheăm Ia Pnôn, tơring Đức Cơ tối:

‘’Á phiu ro ‘nâng, tung hơnăm nếo, Khu xiâm pơkuâ Mô đô̆i gâk tơkăng kong kong pơlê Gia Lai hiăng vêh a cheăm tơkŭm po diâp kơxuô tơmeăm, khăm ivá ăm kuăn pơlê, kuăn pơlê cheăm ƀă 4 thôn pơlê mơnê hên ‘nâng tơdroăng tơmâng tŏng gum dêi Khu xiâm pơkuâ Mô đô̆i gâk tơkăng kong ƀă mâu tíu cheăng rơtế pêi pro’’.

Ia Pnôn cho cheăm gâk tơkăng kong dêi tơring Đức Cơ, kong pơlê Gia Lai ƀă ki hên kuăn pơlê cho kuăn pơlê hdroâng kuăn ngo, tơdroăng rêh ối trâm hên pá puât. Nôkố kơxô̆ rơpŏng kơtiê dêi cheăm u ối 16,49%. Ƀă troăng pêi ôh tá lôi kơbố parŏng ƀă tơniăn rêm rơpŏng pơrá ai Têt, tơdroăng hiăng pêi pro hên tơdroăng ki kal khât.

A Dak Lak, Tơdroăng ‘’Hơngưi Gâk tơkăng kong hơtô hiêm mơno kuăn pơlê’’ xuân pơla kố nah châ Khu xiâm Pơkuâ Mô đô̆i gâk tơkăng kong kong pơlê châ tơkŭm po a cheăm Ia Lốp, tơring Ea Súp. Rơtế ƀă tơdroăng phiu ro dêi hâi leh, mâu tơdrá xoâng khua luống dêi kuăn pơlê hdroâng kuăn ngo Thái môi tiah rơkong khôp pâ pói vâ mêi tro tô ‘ló, rơnó pêi lo châ hên tơmeăm. Nâ Hà Thị Tằm, kuăn pơlê thôn Nừnh Nhạt, cheăm Ia Lốp tối ăm ‘nâi, tơdroăng xah hêi kố ôh tá xê to môi tơdroăng ki xah mê ối djâ ki kơnâ khôi túa lĕm, hiêm mơno tơrŭm môi tuăn ƀă cho roh vâ kuăn pơlê mơhno tơdroăng ki ƀeăn ƀĕng, hiêm mơno pơlê pơla:

‘’Á châ hriâm ing ối kŭn, tiô jâ pôa, pin thế pơtâp ăm rơxông ối nếo tâng ôh tá vâi kô hiêt lôi khôi túa lĕm dêi hdroâng kuăn ngo pin. Khua luống cho vâ tối cho khôp pâ mêi tro tô ‘ló, pêi kâ châ hôm’’.

Rơtế ƀă mâu khu tơrŭm cheăng mâu tơdroăng mơhno khôi túa lĕm tro, mâu mô đô̆i gâk tơkăng kong ối tơrŭm ƀă khu thái, ƀok thái pơkeăng dêi Hngêi pơkeăng Đăi hok Y dươ̆k Ƀuôn Ma Thuột khăm ƀă xing xoăng pơkeăng tê kơtê ăm kuăn pơlê. Nâ Cầm Thị Sáu ối a thôn Đóng, rơrêk tung hiêm mơno tối:

‘’Mơnê Mô đô̆i gâk tơkăng kong hiăng tơkŭm po hâi xah hêi ro kố vâ kuăn châ khăm ivá, châ kơxuô kơƀănh chưng, châ veăng xah rơhdruê xoâng’’.

Jâ Lăng Thị Nguyên, Kăn phŏ Hnê ngăn Viƀan kuăn pơlê cheăm Ia Lốp, tơring Ea Súp tối ăm ‘nâi, cheăm ai lối 1.800 rơpŏng, ƀă 15 hdroâng kuăn ngo nhŏng o rơtế rêh ối, kơxô̆ rơpŏng kơtiê lối 54%. Tơdroăng ‘’Hơngui Gâk tơkăng kong hơtô hiêm mơno kuăn pơlê tung pơlê’’ hiăng djâ ăm kuăn pơlê tíu kố môi rơnó hơngui hơtô:

 ‘’Tơdroăng hơngui Gâk tơkăng kong hơtô hiêm mơno kuăn pơlê tung pơlê ƀă 1 cheăm tơkăng kong ai tơdroăng kố cho tơdroăng phiu ro, hơniêp lĕm ƀă tơdroăng ki mơhnhôk kân ƀă kuăn pơlê cheăm Ia Lốp. Hiăng djâ ăm môi rơnó hơtô ăm kuăn pơlê roh Tết Ất Tỵ’’.

A tơdroăng pêi pro, vâ chê 400 kơxuô tơmeăm hiăng châ diâp troh mâu rơpŏng ai hnoăng tơnêi têa ƀă rơpŏng kơtiê, rơtế ƀă môi toăng hngêi ‘’Tơrŭm môi tuăn’’ kơnâ 100 rơtuhliăn. Ki rơhêng vâ tối, mâu hnoăng liăn hriâm rơkê xuân châ diâp ăm hok tro kơtiê hriâm rơkê, kum ăm mâu vâi o xông xông prôk tung la ngiâ. Đăi tă Rơ Lan Ngân, Phŏ Chĭnh ŭy Mô đô̆i Gâk tơkăng kong kong pơlê Dak Lak tối ăm ‘nâi:

‘’Klăng roh têt Ất Tỵ hơnăm 2025, Mô đô̆i Gâk tơkăng kong kong pơlê hiăng tơkŭm po mơhnhôk mâu khu ki tŏng gum pêi pro hên tơdroăng, tung mê ai tơdroăng ngin hiăng pêi pro môi tiah kuăn roăng đông mô đô̆i gâk tơkăng kong, kum o troh hngêi trung, vó tâ phái tuăn pâ, hngêi hơtô gâk kring tơkăng kong kum kuăn pơlê ai liăn ngân tơdah Têt lĕm tro tâ. Ngin xuân pói vâ tuăn pâ dêi kuăn pơlê kơpong tơkăng kong thăm pro krá tơniăn ƀă Mô đô̆i Gâk kring tơkăng kong ƀă rơtế Mô đô̆i gâk kring tơkăng kong pêi pro lĕm tro hnoăng gâk kring hnoăng pơkuâ tơkăng kong’’.

Tơdroăng ‘’Hơngui Gâk kring tơkăng kong hơtô hiêm mơno kuăn pơlê tung pơlê’’ châ tơkŭm po a 2 tơring gâk tơkăng kong dêi kong pơlê Gia Lai ƀă Dak Lak ôh tá xê to kơxuô tơmeăm ‘na châ mê ối cho kơxái tơdjêp tuăn pâ khu lêng kuăn pơlê, thăm kât krá kâk tơrŭm cheăng pơla khu Mô đô̆i gâk tơkăng kong ƀă kuăn pơlê mâu hdroâng kuăn ngo, mơjiâng xiâm kối krá tơniăn ăm môi tơkăng kong hơniêp lĕm, plâi hơtô./.