Kơxo lơ 9/1 a Pơlê kong Kân Hồ Chí Minh, drêng hbrâ tơdah têt Nguyên đán khôi hmâ Ất Tỵ 2025 hiăng vâ troh la ngiâ, tơmiât troh 95 hơnăm Hâi mơjiâng Đảng Kŏng san Việt Nam (3/2/1930-3/2/2025) pôa Tô Lâm, Kăn xiâm pơkuâ hnê ngăn cheăng Đảng troh veăng hôp ƀă hnê mơhno a rôh trâm mâ mâu kăn pơkuâ Đảng, Tơnêi têa, kăn ƀô̆ hneăng hdrối ki kơhnâ rơkê, khu kăn ki rơkê plĕng ‘na khoa hok, văn nghê̆ sih mâu kong pơlê, pơlê kong kân peăng Hdroh. A rôh trâm mâ, pôa Tô Lâm, Kăn xiâm pơkuâ hnê ngăn cheăng Đảng tối rơdêi, a mâu rôh hôp pơla hdrối kố nah, Tíu xiâm Đảng hiăng môi tuăn khât ‘na tơdroăng ki mơnhên hlê plĕng ‘na chal nếo, chal ki mơeăm tơná dêi hdroâng mơngế, mê cho chal mơnhông, hơnăm kro mơdrŏng rơdêi xua tơdroăng pơkuâ dêi Đảng Kŏng san.

Rôh ki pơxiâm chal nếo cho Hneăng hôp 14 dêi Đảng ƀă vâ pêi pro mâu troăng tơmiât, tơdroăng ki xiâm tung la ngiâ kố, Đảng, Khu xiâm pơkuâ tơdroăng kal kí, Khu pơkuâ hnê ngăn Đảng, Kuô̆k hô̆i, Chin phuh hiăng mơ’no hên troăng hơlâ ki kal. Kăn xiâm pơkuâ hnê ngăn cheăng Đảng ăm ‘nâi, Đảng Tơnêi têa đi đo mơnhên nhên tơdroăng mơnhông rĕng la athế krá kal châ mơjiâng tung tơdroăng rơkê dêi khoa hok, kong ngê̆, pơhlêh kơxô̆ ƀă malối cho xo kuăn mơngế pro tơdroăng ki kal, tơtrŏng mơnhông mâu ngế cheăng rơkê. Pơtối mơhnhôk khu mơdró kâ ‘no liăn cheăng tung hriăn ngăn ƀă mơnhông, malối cho tung mâu kơvâ cheăng kong ngê̆ rơxông nếo lơ kong ngê̆ sinh hok; pro ivá tơ’lêi hlâu ăm khu mơdró kâ pơxiâm pêi cheăng, pơhlêh nếo tơmiât rơkê ƀă pro chiâng mâu tơdroăng ki kơnía ‘na cheăng kâ nếo.