A roh pêi cheăng, pôa Tô Lâm, Kăn xiâm pơkuâ hnê ngăn Đảng kheăn kơdeăn khu lêng Quân khu hiăng kêi đeăng lĕm tro hnoăng cheăng tung hơnăm hiăng hluâ. ‘Na hnoăng cheăng tung la ngiâ, Kăn xiâm pơkuâ hnê ngăn Đảng pơkâ thế, Quân khu kal đi đo hlê plĕng pêi pro trâu hơhngế troăng hơlâ dêi Đảng, troăng hơlâ, luât Tơnêi têa, pơkâ pêi dêi Quân Ŭy Tơnêi têa, Khu xiâm pơkuâ lêng ƀă tơdroăng hnoăng cheăng dêi Khu lêng Quân khu, khŏm mơ-eăm kêi đeăng ƀlêi trâng mâu pơkâ, hnoăng cheăng Pơkâ Hneăng hôp má 13 dêi Đảng, Pơkâ Hneăng hôp Đảng ƀô̆ Quân khu roh má X.

Hbrâ, thăm tơbleăng Quân ŭy Tơnêi êa, Khu xiâm pơkuâ lêng ƀă tơrŭm ƀă khu râ kăn pơkuâ hnê ngăn cheăng Đảng, khu râ kăn pơkuâ kong pơlê tơdroăng gâk kring tơnêi têa tâi tâng kuăn pơlê, tơdroăng gâk kring tâi tâng kuăn pơlê ƀă gâk kring kuăn pơlê ƀă mơjiâng kơpong hbrâ mơdât krá tơniăn. Ki rơhêng vâ tối thế ‘nâi nhên tơdroăng, tơleăng teăm tơdrêng mâu tơdroăng, ôh tá ăm kơdrâ, rak krá tơniăn kal kí, pro tơ’lêi hlâu vâ mâu kong pơlê mơnhông cheăng kâ – rêh ối pơlê pơla.