Tiô tối tơbleăng, hơnăm 2024, Chin phuh, Ngế pro xiâm hnê ngăn Chin phuh hiăng séa ngăn khât a mâu tơdroăng pơkâ, mơgêi dêi Tíu xiâm Đảng, Kuô̆k hô̆i vâ hnê mơhno, ‘mâi rơnêu tro troăng, mê tơdroăng cheăng kâ rêh ối pơlê pơla tơnêi têa pin pơtối ‘mâi mơnhông tơƀrê; châ tơƀrê hên tơdroăng tung tâi tâng mâu kơvâ cheăng ƀă hlo tơƀrê tâ hơnăm 2023.

Tơpui a Rôh hôp,  pôa Phạm Minh Chính, Ngế pro xiâm hnê ngăn tơnêi têa tối nhên, Rôh hôp hâk tơngăm khât châ pôa Tô Lâm, Kăn xiâm pơkuâ hnê ngăn cheăng Đảng troh veăng hôp ƀă tơpui hnê mơhno. Ƀai pơchuât hnê mơhno gá kal khât, tá hiâm mơno, trâu hngế ƀă tŭm têk dêi kăn xiâm pơkuâ hnê ngăn cheăng Đảng cho ivá mơhnhôk kân ƀă cho troăng pơkâ tơdrăng ăm Chin phuh, rêm râ, mâu kơvâ cheăng, mâu kong pơlê tơbleăng pêi pro hnoăng cheăng hơnăm 2025 ƀă tung la ngiâ. Inâi dêi hơnăm 2025 cho “Kơtăng pôu râng; hbrâ rơnáu teăm tơdrêng; rơkê tơƀrê; mơdêk mơnhông”, Chin phuh, Ngế pro xiâm hnê ngăn Chin phuh tơkŭm hnê mơhno pêi pro tơdâng tơ’mô mâu tơdroăng pơkâ, mơgêi dêi Đảng ƀă Kuô̆k hô̆i, tơkŭm tung 3 tơdroăng mơnhông tơƀrê tung la ngiâ, 6 hnoăng cheăng ki kal, 12 khu troăng hơlâ ki xiâm ƀă 185 hnoăng cheăng ki nhên.