Tung pơla kố nah, tơrŭm kal kí, tơpui kâ ƀă kong têa ê Việt nam – Lếo pơtối mơnhông lĕm, tơrŭm, loi tơngah dêi pó; péa pâ hiăng tơkŭm po châ tơƀrê Hneăng hôp roh má 46 Viƀan Chin phuh Việt Nam – Lếo (7/1/2024) ƀă Roh trâm mâ tiah hmâ péa Đảng hơnăm 2024 (26/2/2024); thăm tơkŭm po mâu roh lăm pôu dêi khu râ kăn pơkuâ xiâm ƀă mâu râ. Việt Nam nôkố ai 241 tơdroăng tơkêa bro mơ’no liăn cheăng a kong têa Lếo ƀă tâi tâng kơxô̆ kĭ lối 5,5 rơtal dolar, pơtối rak tíu ối má 3 tung mâu kong têa, kơpong tơnêi tơníu (kơ’nâi Sinuâ, Siam).

Pêi lo liăn tê mơdró Việt Nam – Lếo 10 khế dêi hơnăm 2024 châ 1,7 rơtal dolar (tâk lối 28% tâng pơchông ƀă roh kố hơnăm 2023). Péa pâ tơrŭm krá tơniăn, tŏng gum dêi pó a mâu hneăng hôp tơpui tơno tơrŭm cheăng kơpong ƀă Lâp plâi tơnêi; ki má lối tung ASEAN, Khu lâp kong têa ƀă mâu troăng pêi kơpong kŭn. Tung hơnăm 2024, Việt Nam hiăng thăm tŏng gum kong têa Lếo tơniăn châ tơƀrê mâu hnoăng cheăng lâp plâi tơnêi ki kal môi tiah Kăn xiâm hnê ngăn ASEAN 2024, Kăn xiâm hnê ngăn AIPA 45.