Hâi leh “ Hâk tơngăm hok tro, sinh viên Dak Lak” pêi pro hên tơdroăng môi hdrôh mê cho hôp “ Droh rơtăm mo lĕm châ”, tơdroăng pêi pro “ Trâm mâ mơhno túa lĕm tro Việt Nam - Ấn Độ”, Tơ’noăng um kơchuâ “Hak tơngăm Việt Nam”, Hôp tơpui tơno  “Mơdêk tơƀrê tơdroăng sinh viên pêi pro 5 tơdroăng lĕm tro”, Tơ’noăng “Hơdruê tối ‘na hơnăm ối nếo”, mâu tơdroăng pêi pro rơtế ƀă “Sinh viên pêi pro 5 tơdroăng lĕm tro”,  “Hok tro pêi pro 3 tơdroăng lĕm tro”, “Hok tro hriâm pêi pro 3 tơdroăng” ƀă tơdroăng tơbâ 75 hơnăm Hâi tơbâ tơdroăng  lĕm tro sap ing nah hok tro, sinh viên ƀă Khu ngăn Sinh viên Việt Nam.

Ki vâ tối dêi hâi leh cho mâu tơdroăng pêi pro dêi Sinh viên tơrŭm ƀă lapa plâi tơnêi, trâm mâ mơhno túa lĕm tro Việt Nam - Ấn Độ. Mâu sinh viên châ tơpui tơno, tơbleăng ‘na mơhno túa lĕm tro, leh mơdĭng ƀă mâu tíu ôm hyô ki lĕm ro a Dak Lak ƀă Ấn Độ, trâm tơpui tơno ƀă sinh viên Ấn Độ dki dế hriâm a hngêi trung Đại học Y Dược Buôn Ma Thuột. Sinh viên Lê Quốc Tuấn, hriâm Kơvâ m,ơdró kâ, Hngêi trung Đại học Tây Nguyên tối:   

“Kố cho rôh apoăng a châ veăng pêi pro tơdroăng trâm mâ ƀă vâi pú lâp plâi tơnêi môi tiah kố. A cho mơngế ki liâ la drêng veăng trâm mâ a hlo vâi pú Ấn Độ môi tiah hmâ, hâk vâ tơpui tơno. Ai rôh châ veăng trâm mâ mâu tơdroăng tơrŭm ƀă lâp plâi tơnêi tiah kố mê a hlo nhoăm ‘nâng xua a kô châ tơpui tơno thăm hlê tơpui nâl kong ê, khên tơnôu tâ drêng ối a ngiâ pú hên, tơrŭm pro hmâ ƀă hên ngế, chiâng ai hên ngế ki tơrŭm nếo”.

Rôh kố, Khu pơkuâ ngăn Đoân droh rơtăm Dak Lak hiăng tơbleăng mơjiâng Câu lak ƀô̆ sinh viên pêi pro 5 tơdroăng  lĕm  tro râ kong pơlê, khê̆n kơdeăn “ Hok tro pêi pro 3 tơdroăng lĕm tro”, “ Sinh viên pêi pro 5 tơdroăng lĕm tro rêm râ hơnăm hriâm 2023-2024, diâp hnoăng liăn hriâm “ Eăng bâ púi vâ Hơnăm ối nếo Dak Lak”, diapa hnoăng liăn ăm sinh viên  Lếo ki dế hriâm a mâu hngêi trung a Dak Lak. Nâ Phan Thị Trinh, Phŏ Bí thư Đoân droh rơtăm Dak Lak  ăm ‘nâi, mâu tơdroăng pêi pro vâ pro tíu xah hêi ki ai pơxúa ăm hok tro sinh viên, tơbâ tơdroăng ki môi tuăn, hlê plĕng hnoăng cheăng dêi rơxông nếo.

“Môi plông xah hêi ăm vâi o veăng xah, trâm mâ hriâm ing dêi rơpó, hriâm tơrŭm cheăng ƀă lâp plâi tơnêi ƀă mâu vâi pú sinh viên Ấn Độ ƀă Lếo. Khu pơkuâ cheăng ngăn Đoân droh rơtăm kong pơlê xuân ai mâu tíu tối nhên vâ rơtế ƀă mâu vâi o hok tro sinh viên pêi 3 tơdroăng ki  lĕm tro, hok tro pêi 3 tơdroăng hriâm tâp, rơtế ƀă mâu tơdroăng pơkâ vâ mâu vâi o kô ai ivá veăng pêi cheăng ƀă  khu tơrŭm cheăng đoân, hô̆i tung la ngiâ”.

Hdrối mê, Khu pơkuâ ngăn đoân Dak Lak, Khu tơrŭm cheăng ngăn droh rơtăm Việt Nam kong pơlê ƀă Khu Sinh viên Việt Nam kong pơlê xuân hiăng tơrŭm ƀă Tơdroăng “Trâm mâ ƀă khê̆n kơdeăn sinh viên kuăn ngo kơhnâ rơkâ” kong pơlê Dak Lak rôh má 6.

Tung mâu hơnăm hdrối nah, mâu luât pơkâ  mơnhông cheăng kâ, túa lĕm tro a mâu pơlê hơngế hơngó, mâu pơlê kuăn ngo rêh ối dêi tung kong pơlê Dak Lak pêi cheăng hlo châ tơƀrê. Tơdrêng ƀă droh rơtăm lâp tơnêi têa, droh rơtăm Dak Lak  pơtối mơhno hnoăng cheăng tơná, ôh tá la mâi pơtê, ôh tá la lâi pơtê hriâm, mơ-eăm mơnhông tung rêh ối. Rế ton rế hên droh rơtăm kuăn ngo ai ivá cheăng ƀă hriâm troh lâm kân, tơmâng xo ki rơkê, khoa hok, hriâm tơdroăng rêh ối, ivá cheăng pơlê pơla vâ pơxúa ăm Tơnêi têa, mơjiâng pơlê xiâm tơná.

A tơdroăng, sinh viên hiăng pêi hên tơdroăng cheăng mê cho: Tâp  nháng a Tíu meăn tơbâ mâu ngế hlâ ai hnoăng Nam Tiến ƀă têk nháng a Um meăng Pôa Hồ; tơdroăng “ Tăng ngăn mơhno túa lĕm tro”, hneăng hôp “ Tơpui tơno ‘na túa vêa vong sinh viên Dak Lak tung tơdroăng tơrŭm ƀă mơnhông tơƀrê”, tơpui tơno “ Tơdjêp pơla Sinh viên ƀă mơngế mơdró rơkê, khu mơdró kâ”. Ing mê, kum sinh viên hlê trâu tâ nêó ki pơxúa túa lĕm tro ƀă vêa vong dêi kong pơlê; khên tơpui tơno, veăng hnê tối a mâu tơdroăng pêi pro mơhno túa lĕm tro, rêh ối pơlê pơla, veăng ‘no hnoăng mơnhông dêi kong pơlê. Sinh viên H Uyên Byă, hngêi trung Đại học Sư Phạm pơlê kong kân Hồ Chí Minh tối:

“Mâu tơdroăng pêi pro hâi kố kum a hlê ‘na rêm ngế hên tâ, kum a hlê tơ’nôm ‘na ki pơxúa túa lĕm tro a tíu ki a rêh ối. Tơdroăng mê xuân pro a thăm rế vâ vêh dêi a pơlê ƀă mơnhông tơná tâ vâ kum dêi pơlê mơnhông tơƀrê ƀă hâi kố a sôk ro xua a cho môi tung mâu ngế sinh viên kuăn ngo châ khê̆n kơdeăn”.

Rôh kố, Khu Sinh viên Việt Nam kong pơlê Dak Lak hiăng khê̆n kơdeăn 50 ngế sinh viên kuăn ngo ki kơhnâ rơkê tung hơnăm hriâm- 2023-2024. Tơkŭm tơbleăng Câu lạc bộ Túa lĕm tro Sinh viên Dak Lak. Câu lạc bộ châ mơjiâng  vâ pro tíu xah hêi ai pơxúa, kum mâu vâi pú hơnăm ối nếo ai rôh tăng ‘nâi plĕng, ƀă pơtối rak mâu tơdroăng ki kơnía túa lĕm tro ton nah dêi kuăn ngo tơná.