A cheăm Ia Pnôn, tơring Đức Cơ, Khu xiâm pơkuâ Mô đô̆i gâk tơkăng kong kong pơlê Gia Lai hiăng tơkŭm po tơdroăng ‘’Hơngui Gâk tơkăng kong – Hơtô hiâm mơno kuăn pơlê tung Pơlê’’ hơngui Ất Tỵ 2025. Ia Pnôn cho cheăm tơkăng kong, ƀă ki hên cho mơngế hdroâng kuăn ngo, tơdroăng rêh ối ối trâm hên pá puât; kơxô̆ rơpŏng kơtiê dêi cheăm u ối 16,49%.

Ƀă troăng pêi ôh tá lôi kơbố parŏng ƀă tơniăn rêm rơpŏng kuăn pơlê pơrá ai Têt, tơdroăng hiăng pêi pro hên tơdroăng ki kal môi tiah: ‘’Roh kơchơ Têt 0 liăn’’, tơdroăng kơxuô kơƀăn chưng ngiât ƀă mơhno khôi túa lĕm ‘na rơhdruê xuăng. Roh kố, Khu xiâm pơkuâ Mô đô̆i gâk tơkăng kong kong pơlê Gia Lai hiăng diâp 100 kơxuô tơmeăm ăm mâu rơpŏng ai hnoăng tơnêi têa ƀă rơpŏng ai tơdroăng rêh ối pá puât. 20 ngế hok tro cho ‘’kuăn roăng dêi mô đô̆i gâk tơkăng kong’’ xuân châ tơdah kơxuô tơmeăm Têt.

Khu xiâm ngăn ƀok thái pơkeăng hơnăm ối nếo Việt Nam nếo tơrŭm ƀă Khu ngăn pơkeăng kong pơlê Dak Lak tơkŭm po tơdroăng “Hơngui pleăng hnoăng tơná - Têt tŏng gum” a cheăm Chư̆ Kpô, tơring Krông Ƀuk. Tơdroăng kô hiăng diâp ăm 20 kơxu tơmeăm ăm hok tro ƀă mâu rơpŏng kơtiê xơpá, kơjo gum pâ pơlât plâi nôih tê kơtê ăm 10 ngế  vâi hdrêng ƀă 50 ngế pâ phaco - mâu ngế ki châi ‘na mâ a tơring Krông Ƀuk.

Khăm pơlât, axoăng pơkeăng tê kơtê ăm 500 ngế kuăn pơlê tung cheăm Chư̆ Kpô. Rôh kố, Khu tơkŭm po xuân lăm pôu, hbru tơmeăm ăm 5 rơpŏng hngêi kơtiê ai hnoăng ƀă kăch măng tung cheăm Chư̆ Kpô, tơring Krông Ƀuk. Tâi tâng kơxô̆ liăn ‘no pêi tơdroăng mê ai 1, 3 rơtal liăn.

Tơdroăng kố pêi cheăng ai pơxúa khât kơjo kum, tơmâng ngăn tơdroăng xah hêi ro Têt hơnăm nếo phâi tơtô, tơkŭm tơrŭm dêi rơpó, rơkâu ivá mo lĕm, tơdroăng sôk ro ăm mâu vai o, mâu kuăn pơlê a mâu pơlê cheăm kơtiê xơpá dêi kong pơlê Dak Lak.