Vi ƀan pơkuâ cheăng Kuô̆k hô̆i kô ăm hnê tối ‘na tơdroăng tối mơnhên, tơmâng xo, ‘mâi rơnêu tơdroăng chêh tung hlá mơ-éa Luât Kơmăi kơmok kŏng ngê̆ kơxô̆; hlá mơ-éa Luât Cheăng pêi (‘mâi hơ’lêh); tơdroăng hlá mơ-éa luât ‘mai hơ’lêh, tơ’nôm mâu tơdroăng dêi Luât tơbleăng; hlá mơ-éa Luât ‘mâi hơ’lêh, tơ’nôm mâu tơdroăng Luât Tiô pơkâ ƀă Tơtro tiô kih thuât.

Pakĭng mê, Vi ƀan pơkuâ cheăng Kuô̆k hô̆i séa ngăn, tơbleăng Pơkâ  ki nhên tơdroăng tơkŭm trâm mâ kuăn pơlê dêi mâu kăn Kuô̆k hô̆i ƀă mâu kăn Hô̆i đong kuăn pơlê; Pơkâ dêi Vi ƀan Pơkuâ cheăng Kuô̆k hô̆i  pơkâ pêi pro tiô tuăn kuăn pơlê tung tơdroăng cheăng dêi mâu kơ koan dêi Kuô̆k hô̆i, kơ koan dêi mâu râ kăn xiâm Kuô̆k hô̆i, mâu kơ koan dêi Hô̆i đong kuăn pơlê rêm râ. Rôh kố, Vi ƀan pơkuâ cheăng Kuô̆k hô̆i ăm hnê tối ‘na tơdroăng hbrâ rôh hôp ki ôh tá xê tiah hmâ rôh má 9, Kuô̆k hô̆i  hneăng 15.