Mê cho, jâ Nguyễn Thị Thu Nguyệt , Kăn hnê ngăn Đảng pơlê kong krâm Buôn Hồ, châ rah lăm pêi cheăng pro Kăn phŏ pơkuâ khu kăn pơkuâ mâu kăn Kuô̆k hô̆i kong pơlê Dak Lak, riân sap hâi lơ 6/1/2025. Khu kăn Đảng kong pơlê xuân tơbleăng pơkâ xing xoăng hnoăng lăm pêi cheăng, ƀă rah xo jâ H’Yim Kđoh, Ngế cheăng tung Khu kăn pơkuâ hnê ngăn cheăng Đảng, Phŏ kăn hnê ngăn Vi ƀan kuăn pơlê dêi kong pơlê, pro Kăn hnê ngăn Đảng pơlê kong krâm Buôn Hồ hneăng 2020-2025, pơxiâm sap hâi lơ 6/1/2025.

Jâ H’Yim Kđoh xuân châ rah pêi cheăng tung Khu Đảng ƀô̆ pơlê kong krâm ƀă Khu kăn pơkuâ hnê ngăn cheăng Đảng pơlê kong krâm Buôn Hồ. Pôa Nguyễn Đình Trung, Kăn hnê ngăn Đảng kong pơlê rơkâu ƀă tơmâng xo mơnê mâu hnoăng hiăng veăng ‘no pêi pro dêi jâ Nguyễn Thị Thu Nguyệt ƀă jâ H’Yim Kđoh tung hnoăng cheăng, hlối púi vâ mâu kăn tối kơpêng mê drêng xo pêi hnoăng cheăng ki nếo mơ-eăm pơtối rak vế pêi cheăng tâi ivá ki rơkê tơná, rŭm môi tuăn rơtế ƀă pú hên dêi mâu tíu pêi cheăng pê klêi mâu hnoăng cheăng ki châ pơcháu.