Ing mê, hâi lơ 2/1, pôa Nghiêm hiăng pơtroh hlá đơn ăm Khu pơkuâ ngăn cheăng Đảng kong pơlê Dak Lak, Vi ƀan kuăn pơlê dêi kong pơlê Dak Lak ƀă Khu ngăn mơdró kâ, tối púi vâ châ pơtê hdrối tro hơnăm pơtê cheăng. Tung hlá đơn, pôa Nghiêm tối tiah kố plâ 40 hơnăm pêi cheăng, pôa hiăng veăng pêi hên tơdroăng cheăng ƀă đi đo pêi klêi mâu tơdroăng cheăng ki châ pơcháu.

Loi khât a troăng hơlâ, luât pơkâ ki nếo dêi Đảng ƀă Tơnêi têa, vâ pro tơ’lêi hlâu tung tơdroăng xing xoăng khu tơrŭm cheăng, pôa pâ pơtê hdrối kơ hơnăm pơtê cheăng. Ngế pơkuâ ngăn mơngế cheăng ăm tơnêi têa dêi kong pơlê Dak Lak tối tiah kố, tơdroăng pôa Nguyễn Văn Nghiêm pâ pơtê cheăng cho tơdroăng pơkâ ki nhoăm, mơhno ki tơmiât nhên vâ dêi, ing hnoăng cheăng pêi, hlối veăng kum mâu kơ koan, kơvâ cheăng râ kơpêng tơ’lêi hlâu tung tơdroăng pêi pro mâu tơdroăng hnê mơhno cheăng dêi Tíu Xiâm tơnêi têa pơtroh xoăng hnoăng cheăng ăm mâu kăn.