A roh hôp mâu kăn pêi cheăng Chin phuh tơpui tơno séa ngăn, tơpui tối, tơbleăng ƀă 4 tơdroăng tơkêa bro Luât, mê cho: Luât Khu pêi cheăng Chin phuh (‘mâi rơnêu); Luât khu râ kăn pêi cheăng kong pơlê (‘mâi rơnêu); Luât Tơbleăng ăm pêi pro mơ-éa pơkâ dêi luât (‘mâi rơnêu); Luât veăng khu lêng râk hơniâp lĕm Khu lâp kong têa.

Xông tơpui a roh hôp, pôa Phạm Minh Chính, Ngế pro xiâm hnê ngăn tơnêi têa mơnhên, kố cho mâu tơdroăng tơkêa bro luât, pơkâ ki kal, vâ teăm tơdrêng pơkâ mâu troăng pơkâ pêi kân dêi Đảng ‘na pơhlêh nếo  khu pêi cheăng, tơdroăng pêi cheăng dêi Chin phuh, khu râ kăn pơkuâ tiô troăng ‘’Bro lế lĕm tro – rơdêi – châ tơƀrê hôm drêng xúa – xêt khât – châ tơƀrê păng ‘nâng’’. Chôu iâ, pơkâ hên, kơpong rơdâ, tơdroăng xiâm pá, tơvâ tơvân, Ngế pro xiâm hnê ngăn tơnêi têa pơkâ thế mâu kăn pêi cheăng tung Chin phuh tơkŭm tuăn ngôa rơkê, pơchuât tơbleăng, xông tơpui ‘nâng ‘nâi, tŭm, nhên, prôk tơdrăng tung tơdroăng ki kal; tơkŭm tơpui tơno ‘na tơdroăng ki kal, rơkong tơpui phá tơ-ê dêi pó kal tơpui tơno, pâ rơkong tơpui Chin phuh; tơniăn tro tơdroăng, châ tơƀrê hôm dêi Roh hôp.