Tiô tối tơbleăng, mâu hơnăm hdrối nah, kong pơlê Gia Lai hiăng xúa rơkê mâu tơdroăng ki ai hlâu, mâu tơdroăng ki pơxúa, châ pêi tơƀrê hên mâu tơdroăng ki kal, chía vâ pêi klêi tŭm têk, rak vế tíu ối tung la ngiâ ‘na tơdroăng cheăng kal kí, tơdroăng cheăng lêng, gâk kring; tơdroăng cheăng kâ pơhlêh tơƀrê, tro troăng, mơdêk rêm tơdroăng châ 6,21% tung hơnăm, túa pơkâ cheăng kâ mơdêk tâk vâ châ 2 xôh tâng pơchông ƀă apoăng hneăng.

Klêi kơ’nâi mơhno nhên mâu tơdroăng ki ai hlâu ki xiâm dêi kong pơlê, pôa Tô Lâm, Kăn xiâm pơkuâ hnê ngăn cheăng Đảng tối nhên túa tơmiât dêi Đảng, Tơnêi têa ƀă pơkâ thế mơdêk ƀă mnhông pơkâ mơ’no ăm Gia Lai cho hên khât. Kăn xiâm pơkuâ hnê ngăn cheăng Đảng pơkâ thế Gia Lai séa ngăn mâu tơdroăng pơkâ, hnoăng cheăng pêi, troăng hơlâ pơkâ nhên, tŏng gum xơpá ăm tơdroăng mơnhông, mơ-eăm pêi pro châ a kơlo ki hên má môi hnoăng cheăng ki Pơkâ kong pơlê Đảng ƀô̆ rôh má 16 hiăng mơ’no.

Tơkŭm pơkuâ, hbrâ tro mâu tơdroăng tơkŭm po ƀlêi chiâng hneăng hôp Đảng ƀô̆ rêm râ ƀă Hneăng hôp kong pơlê Đảng ƀô̆ rôh má 17. Drêng kố, pôa Tô Lâm, Kăn xiâm pơkuâ hnê ngăn cheăng Đảng hiăng diâp Hngêi pơkeăng ăm cheăm Glar, tơring Đăk Đoa kơnâ 5 rơtal liăn.