Rôh hôp tơkŭm tơpui tơno ‘na tơdroăng mơgêi tơdroăng cheăng dêi Vi ƀan Pơkuâ ngăn liăn ngân Tơnêi têa a khu mơdró kâ ƀă tơdroăng pơcháu hnoăng, tơdroăng cheăng pêi dêi kăn teăng mâ ngế ki pơkuâ Tơnêi têa ƀă 19 to grup, kŏng ti xiâm; tơdroăng ki xing xoăng, tơrŭm kơ koan cheăng dêi Tổng cục Thống kê.

Klêi tơmâng mâu rơkong tơpui tối, tơpui mơgêi, pôa Phạm Minh Chính, Ngế pro xiâm hnê ngăn tơnêi têa ăm ‘nâi, tung pơla mơnhông, Chin phuh hiăng xúa mâu túa ki phá dêi rơpó tung pơkuâ ngăn khu mơdró kâ Tơnêi têa, pơkuâ ngăn liăn ngân Tơnêi têa a khu mơdró kâ tơtro tiô tơkêa rêm hneăng.

Tiô Ngế pro xiâm hnê ngăn Chin phuh, hơnăm 2025, lâp tơnêi têa mơ-eăm mơdêk cheăng kâ châ iâ hlái cho 8%, pro ivá mơnhông ăm chal mơnhông 2 to kơxô̆ ki pơtối. Xua mê, mâu khu xiâm, kơvâ cheăng xing xoăng túa pêi cheăng, khu tơrŭm ƀă mâu khu pơkuâ, kŏng ti xiâm Tơnêi têa athế tung hiâm mơno “pơkâ ki pơxúa tơnêi têa hdroâng mơngế cho xiâm, ki hdrối tâ” vâ kơxô̆ liăn Tơnêi têa châ pơkuâ ngăn tơniăn tro má môi ƀă mơnhông nếo, gum ăm mơnhông tơnêi têa tung chal nếo.