Khĕn kơdeăn mâu hnoăng hiăng ‘no pêi apoăng tơxâng hâk mơnê, pôa Tô Lâm, Kăn xiâm pơkuâ hnê ngăn Đảng tối nhên, tung la ngiâ, Kuân đoân kal pơtối tơmâng pêi kơtăng tâ nếo pơkâ 35 dêi Khu xiâm Kal kí ‘na rôh hôp kân Đảng rêm râ vâ troh rôh Hôp kân mâu kăn tung lâp tơnêi têa rôh má 14 dêi Đảng.

Tơkŭm hbrâ ƀă tơkŭm pê klêi rôh hôp Đảng rêm râ hneăng hơnăm 2025-2030, tơniăn môi tuăn, tơrŭm, tâi tâng vâ tơrŭm môi. Tơkŭm krá kak tơdroăng ‘mâi mơnhông rêm râ ủy tơkŭm cheăng Đảng ƀă tâi tâng mâu kăn ƀô̆ ƀă kơ koan, tíu pêi cheăng, tơniăn klêi hneăng hôp, mâu khu tơrŭm cheăng Đảng rĕng pơtối pêi hnoăng pơkuâ hnê tíu pêi cheăng tơkâ luâ tơdroăng xơpá, pêi klêi mâu tơdroăng pơcháu, veăng mơjiâng  khu tơrŭm cheăng Đảng krúa rơdêi ‘na kal kí, tuăn mơno, tơkŭm pêi pro ƀă ‘na kăn ƀô̆, mơjiâng tíu pêi cheăng rơdêi tung tŭm tơdroăng “djâ troăng lĕm ahdrối, kơhnâ rơkê’’.

Kơxê hâi ki mê, pôa Tô Lâm, Kăn xiâm pơkuâ hnê ngăn Đảng lăm pôu hlối pêi cheăng ƀă Binh đoân 15 ‘na tơdroăng hiăng klêi pêi cho ‘na cheăng kâ rêh ối cheăng lêng kring gak tơkăng kong.