Jâ Võ Thị Ánh Xuân, Kăn xiâm phŏ hnê ngăn tơnêi têa tối nhên, Việt Nam đi đo ngăn UNICEF môi tiah khu tơrŭm mơnhông kal khât, ai hên tơdroăng veăng gum kal khât ăm tơdroăng rak ngăn, hnê hriâm ƀă gâk kring vâi hdrêng Việt Nam tung hên chât hơnăm hiăng hluâ. Kăn xiâm phŏ hnê ngăn tơnêi têa tối ăm ‘nâi, kơvâ rak ngăn, gâk kring ƀă hnê hriâm vâi hdrêng cho kơjo má môi tung troăng hơlâ mơnhông dêi Việt Nam.

Pói vâ tung la ngiâ UNICEF thăm mơhnhôk kơxô̆ liăn tŏng gum tơdroăng gâk kring ƀă rak ngăn vâi hdrêng Việt Nam, pêi pro mâu Pơkâ mơnhông krá tơniăn, tơdjâk troh vâi hdrêng, ki má lối tung kơvâ hnê hriâm, rak ngăn ivá ăm vâi hdrêng, trếo piê kơhiâm vâi hdrêng, tŏng gum vaccine ăm Tơdroăng pâk vaccine po rơdâ, tơniăn tơdâng tơ’mô pơla kơdrâi kơnốu.