Pôa Phạm Minh Chính pơtroh rơkong rơkâu troh tâi tâng khu hnê kơtú ƀă khu kơtú ƀa long Tơnêi têa Việt Nam klêi kơ’nâi ƀlêi trâng tung roh chung kết roh prôk ƀă roh vêh. Ngế pro xiâm hnê ngăn tơnêi têa tối hâk tơngăm, mơnê Khu kơtú ƀa long hiăng mơ-eăm rơkê má môi, tơ’noăng tâi tâng ivá, khên tơnôu, tơrŭm môi tuăn, mơ-eăm đi đo; Mơnhên, ƀlêi trâng kố ôh tá xê to tơdroăng hâk tơngăm dêi tơ’noăng ivá Việt Nam mê ối tơdroăng ki hâk vâ ăm tâi tâng hdroâng mơngế, mơhno tơdroăng ki pói vâ xông mơ-eăm ƀă gum mâu tơdroăng ki a’ngêi nếo.

Ngế pro xiâm hnê ngăn tơnêi têa pơtroh tơdroăng pâ mơnê trâu hơngế troh mâu ngế hnê kơtú, khu ki tŏng gum, mâu ngế rơtế khu kơtú ƀa long. Ngế pro xiâm hnê ngăn tơnêi têa tơmâng mơnê ăm hrĭng rơtuh ngế ki hâk vâ lâp tơnêi têa hiăng rơtế, ối achê ƀă cho tíu ki hgiên krá dêi khu kơtú ƀa long tung plâ troăng prôk vâ châ kâ kân má môi dêi tơdroăng kơtú ƀa long kơpong.

Rơpâu ngế Việt Nam veăng ngăn tríu hâk suâ ai mâ a plông kơtú ƀa long kong têa Siam Rajamangla a pơlê kong xiâm Bangkok kơmăng hâi lơ 5/1 hiăng phiu ro drêng hlo khu kơtú ƀa long Việt Nam châ kâ khu kong têa Siam vâ tơbriât ối má môi ASEAN CUP 2024. Mơngế hâk vâ ngăn tríu tơkêk mơdêi “Việt Nam ối má môi’’ ƀă hlối hơdruê ƀai “Như có Bác Hồ trong ngày vui đại thắng”. Krâm kuăn pơlê tung lâp tơnêi têa hiăng lo a troăng kân hâk ro châ ƀlêi.

Kố cho châ kâ ối má môi rôh kơtú ki má 3 dêi Khu Việt Nam a rôh tơ’noăng drêng kố. Phiu ro châ blêi xuân veăng ro lâp kơpong Tây Nguyên. A tơdrốu hơlâ troăng kân, tơdế pơlê kong kơdrâm Ƀuôn Ma Thuột, kong pơlê Dak Lak, tâi tâng mâu ngế ki prôk a troăng lăm a kơpong  tơdế pơlê kong kơdrâm, hlối râng hlá cờ khêi hơlŏng trĭng, rơtế hơdruê  ƀai “Như có Bác Hồ trong ngày vui đại thắng”. Tâi tâng rơtế hơdruê ƀai ƀlêi trâng, rơtế ƀă reăng on mlŏi pĕng pơtôu a rơvâ plêng.